Канада го забрани заробеништвото на делфини и китови и нивното користење за забава

Детали

среда, 04 март 2020

Активистите за животински права извојуваа голема победа во Канада. Имено, во државата веќе не е дозволено заробеништво и размножување на китови, делфини и морски свињи за забавни цели.

Актот со кој се прекинува заробеништвото помина во канадскиот парламент во понеделникот. Со ова, китовите, делфините и морските свињи нема да бидат подложени на разни измачувања и трауми за забава на луѓето. Активистите за животински права со години тврдат дека овие атракции се всушност суровост кон животните.

Сепак, во законот има и неколку исклучоци. Животните кои се веќе заробени веројатно ќе останат во истата положба. Истовремено, животните кои се спасени и се лекуваат, или се дел од научни истражувања исто ќе останат во сегашната положба.

Аквариумите, парковите и зоолошките ќе можат да ги задржат животните што ги имале досега, но нема да можат да ги заменат со нови.

Одлуката ја поздрави и поранешниот канадски сенатор Вилфред Мур со изјавата:

„Имаме морална обврска да го искорениме заробеништвото на животните за профит и забава. Канаѓаните ни рекоа да направиме нешто, а ние послушавме.“

Активистите за животински права и маринските научници ја прославија победата и веќе некој период се залагаа за истата со хаштагот #EmptyTheTanks (испразнете ги аквариумите). Empty the Tanks е всушност интернационална кампања, чија цел е да го постигне ова што се случи во Канада. 

Експертите долго време се обидуваат да докажат дека китовите и делфините во заробеништво се изложени на ужасно психичко и физичко страдање. Многу од животните имале хронични здравствени проблеми, покажувале абнормално однесување, знаци на изолација и екстремна здодевност. Заробеништвото резултирало и со висока стапка на смртност на малите животни.

Ребека Алдворт од Humane Society International изјави дека ова е „момент за солзи“ и голема победа на жителите кои сакаат Канада да биде похумана држава.

„Китовите и делфините не припаѓаат во аквариуми, а страдањето на овие социјални и интелигентни животни во заробеништво повеќе нема да се толерира“, изјави таа.

Установите што најмногу ќе ја почувствуваат новата забрана се аквариумот во Ванкувер и водниот парк Marineland. Наводно, во водниот парк во заробеништво се чуваат 55 белуга китови, 5 делфини и 1 орка кит.

Аквариумот, пак, уште минатата година сподели дека повеќе нема да ги користи животните за забава.

Спирова С. | Црнобело