Во Виена забранет е влез во јавен превоз од вратата кај возачот, a луѓето се опуштени и смирени во изолација (фото + видео)

Детали

понеделник, 16 март 2020

Владата на Австрија, од денес воведе нови мерки за изолација од корона вирусот. 

Домот смее да се напушти само во три случаи:

1. Доколку имате работни активности кои не можат да бидат одложени или да се завршат од дома;

2. За итни набавки на храна;

3. Ако треба да помогнете на други лица кои имаат итна потреба.

Отворени остануваат маркетите за храна, аптеките, поштите, бензинските пумпи, банките и продавниците за храна за животни.

Во јавниот превоз забранет е влезот од кај возачот. 

Напоменато е дека нема потреба да се прават огромни залихи на храна.

Жителите смеат да одат на прошетка сами или со оние со кои живеат. Ова е дозволено само ако е апсолутно неопходно, иако во парковите сè уште може да видите луѓе како џогираат, возат велосипеди и одмораат. 

Доколку некој ги прекрши правилата, полицијата може да го казни со 2.180 евра. Сите работат од дома. 

Од вторник 17 март рестораните и баровите ќе бидат целосно затворени. Пред оваа мерка, работеле до 15 часот. Кафулињата продаваат онлајн ваучери за оние кои сакаат да бидат солидарни и да помогнат да не останат без никаков прилив деновиве. Со ваучерите ќе можете да пиете кафе кога ќе помине кризната ситуација.  

Спортски терени и објекти, како и игралиштата се затворени веднаш.

Сите образовни институации се затворени. Градинките и основните училишта обезбедуваат грижа за децата затоа што сакаат да избегнат контакт со нивните баби и дедовци кои се ризична група. 

Помош од 4 милијарди евра е обезбедена за бизнисите кои „страдаат“ за време на изолацијата од корона вирусот. 

Е. П. | Црнобело / фото: С. П. А.