„Како да истрча во мојата прегратка!“ – Бразилски фудбалер ја породил сопругата пред зграда (видео)

Детали

четврток, 08 октомври 2020

Бразилскиот фудбалер Брајан Борхес и неговата бремена сопруга сакале да одат во болница, но не стигнале ни до автомобилот кога таа почнала да се породува.

Фудбалерот Брајан Борхес игра за бразилскиот клуб Nautico Capibaribe, а неодамна имал можност да покаже дека фудбалот не е неговиот единствен талент. Брајан самиот ја породил неговата сопруга.

Милена, неговата сопруга, во 5:30 наутро сфатила дека ѝ пукнал водењакот, а веднаш потоа се појавиле и контракции. 24-годишниот фудбалер веднаш се подготвил да ја однесе Милена во болница, но изгледа на нивната ќерка не ѝ се чекало. Парот едвај излегол пред зграда, кога Милена почнала да се породува.

Брајан веднаш ѝ помогнал да легне на земјата и сфатил дека тој ќе мора да помага во породувањето. Штом Милена легнала на земјата, веднаш почувствувала дека бебето излегува. Но, Брајан бил брз и породувањето поминувало без проблеми. Ќеркичката ја крстиле Сесилија.

Уште поинтересно е што целата ситуација била фатена и на безбедносните камери од зградата, па засекогаш ќе си имаат и спомен од овој среќен настан.

„Само што ја подадов раката и Сесилија веќе излегуваше. Како да истрча во мојата прегратка!“, вели фудбалерот за целиот настан.

„Ова е без сомнение најубавиот ден од мојот живот. Беше навистина посебен и уникатен момент“, додава Брајан.

Откако Милена се породила, Брајан веднаш ја однел во болница. Лекарите ја прегледале Сесилија и му соопштиле на Брајан дека и ќерка му, и сопругата се во одлична состојба.

Спирова С. | Црнобело