Баба по грешка поканила непознат маж на ручек – 5 години подоцна уште ги слават празниците заедно

Детали

среда, 02 декември 2020

Кога Ванда Денч по грешка испратила порака на друг број и го поканила Џамал Хинтон на вечера за Денот на благодарноста, веројатно ни таа ни тој не биле свесни за прекрасното пријателство што ќе се роди помеѓу нив.

Во 2016 година Ванда Денч од Америка се подготвувала за прославата на Денот на благодарноста. Мислејќи дека му пишува порака на нејзиниот внук, Ванда по грешка го поканила тогаш 17-годишниот Џамал Хинтон на вечера.

Џамал зачудено прашал кој е тоа, а Ванда му одговорила „Баба ти“. Момчето се изненадило и ја замолило да му прати слика бидејќи не му било јасно што се случува, а кога Ванда му испратила селфи сфатил дека станува збор за погрешен број.

Тогаш и Џамал ѝ пратил селфи за да ја убеди дека не му испратила порака на внукот, но на шега ја прашал дали поканата сепак важи. Ванда му одговорила:

„Секако дека важи. Бабите го прават тоа – ги хранат сите“.

Откако Џамал навистина отишол на вечера, приказната стана вирална. Уште подобро е што Ванда и Џамал до денес си ја почитуваат традицијата – секоја година на Денот на благодарноста тие имаат заедничка вечера, со семејството на Ванда и девојката на Џамал.

За жал, годинава, сопругот на Ванда почина од ковид-19, но Џамал се погрижил таа да не остане сама за еден од најголемите американски празници.

Бидејќи и во САД има забрана за собири поради пандемијата, Ванда и Џамал го прославиле празникот скромно, само во друштво на девојката на Џамал, како и ќерката и внукот на Ванда. На масата, пак, ставиле фотографија од починатиот сопруг на Ванда.

Ванда и Џамал велат дека веќе се чувствуваат како да се дел од исто семејство и секоја година едвај го чекаат празникот за да се видат.

На крај, Ванда споделила и фотографија на нејзиниот Twitter профил:

„Се надевам дека сите ќе најдат љубов и радост на овој празник. Оваа година Денот на благодарноста ќе ми биде и тажен, и радосен. Со мене нема да биде мојот сакан Лони, но ќе бидам со семејство што навистина го сакам“.

И Џамал го споделил убавиот момент на Twitter:

„Цели 5 години! Среќен празник на сите!“

Спирова С. | Црнобело