Тој бил 36 години постар од неа: Скандалозната љубовна приказна на Чарли Чаплин и Уна

Детали

сабота, 02 јануари 2021

Имала неполни 18 години кога го запознала 53-годишниот Чарли Чаплин...

Уна О’Нил требала да постигне големи работи во животот, верувале сите кои ја познавале. Била образована, прекрасна, од угледно семејство.

Се очекувало ќерката на угледниот нобеловец Јуџин О’Нил и писателката Агнес Болтон да стане подеднакво важна и славна како и нејзините родители.

Учела во најдобрите училишта, се дружела со тогашната њујоршка елита, а како тинејџерка и припадничка на елитно друштво, била прогласена за дебитантка број 1, според престижниот Stork Club.

„Беше тивка и прекрасна, до таа мера што не можеш да тргнеш поглед од неа,“ ја опишувал тогаш 22-годишниот Селинџер кој бил неизмерно заљубен во неа.

Но, тогаш Уна се одлучила да влезе во Холивуд и да стане актерка. Таму го запознала 53-годишниот Чарли Чаплин, познатиот љубител на млади девојки, кој одлучил да ја ангажира за својот нов филм.

Оваа средба Чаплин ја објаснил како „најсреќната случка во животот.“

Наскоро младата убавица започнала врска со средновечниот Чарли Чаплин, од која сите биле згрозени – целата филмска индустрија, како и американската јавност.

Се венчале штом наполнила 18 години. На Чаплин ова му бил четврти брак. Првите три траеле само по неколку години, а две од своите сопруги ги оженил кога имале само 16 години, додека третата имала 19 години.

Неколку месеци пред средбата на Уна и Чарли, тој поминувал низ мачен судски процес во кој старлетата Џоан Бери, го тужела дека е татко на нејзиното дете. Подоцна, ја прогласиле за ментално нестабилна.

Иако бил ослободен од оваа тужба, бракот на Уна и Чаплин го разлутил нејзиниот татко, кој патем бил врсник со него.

Бракот не бил одобрен и Уна прекинала секаков контакт со нејзиното семејство. Таа му пишувала по едно писмо на својот татко секоја недела, но тој ниту ги отворал, ниту ѝ враќал. По бракот со Чаплин, Уна не разменила ниту еден збор со домашните.

Времето покажало дека Уна не погрешила. Не направила никакви огромни и важни работи како нејзините родители, но со својот сопруг имала складен и убав брак кој траел 34 години. Во него, добиле 8 деца – 5 ќерки и 3 сина.

Поголем дел од животот поминале во Швајцарија, каде ги растеле своите деца.

„Тој од мене направи зрела жена, а јас го одржував млад,“ рекла Уна во една изјава.

Уна го надживеала Чаплин за 14 години, но последните години од животот ѝ биле крајно несреќни. Тагата поради неговата смрт ја навела на алкохолизам. Почина од рак на панкреасот во 1991-ва година.

М. Д. | Црнобело