Наставничка им држи онлајн часови на учениците додека прима хемотерапија – ракот не ја спречува да ужива во работата со деца

Детали

вторник, 02 февруари 2021

Кели Клајн е воспитувачка во градинка која не дозволувата нејзината дијагноза и хемотерапијата да ја спречат во нејзината работа – таа продолжила да ги држи онлајн часовите, дури и од нејзината болничка соба.

Повеќето наставници и воспитувачи го избираат ова работно место најмногу поради љубовта кон децата и желбата да им помогнат да станат подобри личности. Кели Клајн е воспитувачка во градинка од Минесота која само го потврдува ова.

Кели има рак на јајниците во трет стадиум и еднаш месечно оди на хемотерапија. Но, таа не само што продолжила со онлајн часовите кога ја добила дијагнозата, туку понекогаш ги одржува и од болницата.

Секој месец, 32-годишната Кели минува по пет часа во болница за хемотерапијата, а во тој период не ги одложува онлајн часовите, туку ги одржува од болничката соба.

За жал, ова не е првпат Кели да оди на третман за ракот. Првата дијагноза ја добила пред околу пет години и тогаш морала да оди на боледување поради агресивниот третман.

Кога пред некој месец дознала дека повторно ќе треба да оди на терапија, одлучила да не оди на боледување, туку да продолжи да си работи бидејќи, како што вели самата, нејзините ученици се светлата точка во овој мрачен период од нејзиниот живот.

„Кога им предавам на 5-годишните деца се чувствувам како да одам во Дизниленд. Сите се возбудени за сè, а ова многу ми го подобрува расположението.

Кога одите на хемотерапија и сте опкружени само со болни луѓе, целото искуство е многу депресивно. Мене, пак, моите ученици ми помагаат да се чувствувам подобро во таква средина“.

Одлуката на Кели да продолжи со работа ја воодушевила и директорката на градинката:

„Со она што го прави, Кели всушност им покажува на децата дека можат да се справат со тешките ситуации и дека тие не ги дефинираат како личности, туку, овие лоши моменти се само дел од нашето животно искуство“, вели таа.

Спирова С. | Црнобело