Louis Vuitton мета на шеги поради „најгрдиот џемпер“ – украсен е со кадифени играчки и чини 8.000 долари

Детали

четврток, 11 февруари 2021

Познатиот бренд Louis Vuitton се најде на мета на шеги и критики поради џемпер од новата колекција, кој во Кина чинел околу 8.000 долари и е украсен со 14-тина кадифени играчки.

 

Џемперот има тегет боја, направен е од волна и има многу необични детали – на него се зашиени околу 14 кадифени играчки.

Според сајтот на познатиот бренд, џемперот е дел од новата колекција, за која наводно дизајнерот црпел инспирација од детството.

Колекцијата ја сочинуваат неколку парчиња украсени со цртани ликови кои изгледаат навистина интересно, но за џемперот речиси и да нема позитивен коментар.

Најпрво џемперот бил забележан на кинескиот сајт на брендот, каде што се продавал по цена од 8.200 долари. Но, сега на истиот сајт пишува дека е распродаден. Моментално џемперот е огласен и на европскиот сајт на брендот, каде што нема наведено цена и пишува дека се изработува по нарачка.

Социјалните мрежи се преплавени со шеги и критики за џемперот, а повеќето нагласуваат дека „вакво чудо“ може да се направи за многу пониска цена.

„Јас ќе го направам ова за 10 долари“.

„Ова е последица од пандемијата“.

„Ако сакате ваков џемпер, само извалкајте се во играчките на вашето дете“.

Многумина се шегуваат и за тажниот израз на лицето на моделот:

„Јасно ни е зошто моделот изгледа толку разочарано“.

„Дури и моделот изгледа тажно. Зарем не се случија доволно лоши работи досега па да нè малтретирате и со ова?“

Но, постојат и луѓе на кои им се допаднал дизајнот и сметаат дека џемперот е уникатен и креативен.

Што мислите вие, дали ова парче облека навистина е креативно, или сепак си ги заслужува шегите и критиките?

Спирова С. | Црнобело