Волшебни фотки од замрзнатите напуштени згради во Воркута – еден од најстудените градови во Русија

Детали

петок, 02 април 2021

Марија Пасер е фотограф од Москва која решила да ги истражува напуштените згради во Воркута, рударски град на северот од Русија познат по екстремно ниските температури, заедно со околната област.

Таа ја истражувала областа околу три недели, а од нејзините фотографии се гледа дека мразот ги „освоил“ напуштените живеалишта кои сега изгледаат надреално.

Во градот и околните селца живееле работници кои работеле на рудник за јаглен, но по распадот на Советскиот Сојуз и постепеното затворање на рудниците, жителите биле присилени да се преселат и да бараат работа на друго место.

Воркута е можеби најпознат по работниот логор – Гулаг – кој се наоѓал овде и бил еден од најголемите во државата.

Всушност, во периодот од 1930-тите до 1960-тите во областа биле сместени затвореници кои биле принудени да работат на рудниците. Дури во годините пред распадот на Советскиот Сојуз во градот почнале да се населуваат луѓе кои барале работа.

Временските услови во градот се екстремни, па за да ги привлечат работниците, им давале доста добра плата, открива Марија за CNN.

Градот уште е населен, но некои области се целосно напуштени, а Марија ги фотографирала токму тие. Наводно, луѓето се иселуваат од градот и неговата популација постојано се намалува.

Додека Марија ја истражувала областа, температурата била неверојатни -38 степени Целзиусови.

„Рацете ќе ви смрзнат. Не можете да ги движите прстите како што треба. Мора постојано да носите ракавици“, вели таа.

Марија имала можност и да поразговара со некои од жителите:

„Разочарани се што местото во коешто се родени и каде што пораснале, умира. Тие сакаат да се иселат од оваа област, но не можат да ги продадат домовите, па ќе треба да ги остават така“.

Наводно, оние кои живееле во областа околу градот надевале дека државата ќе им помогне да се релоцираат, но им нуделе само станови во центарот на Воркута.

Фотографиите на Марија брзо се прославија, најмногу бидејќи ја покажуваат суровоста на екстремно ниските температури. Таа, пак, сака луѓето да ја видат убавината на градот, но и да научат нешто повеќе за историјата преку нејзините фотографии.

„Кога ги истражував замрзнатите згради, имав само две мисли: ’Боже, ова е катастрофално‘ и ’Боже, ова изгледа волшебно‘. Сакам луѓето да го помислат истото кога ќе ги погледнат моите фотографии“.

Спирова С. | Црнобело