Херои на денот: Доктори од Русија продолжиле со операција на срце додека беснеел пожар во болницата (фото)

Детали

понеделник, 05 април 2021

Лекари од рускиот град Благовешченск само што почнале со операција на еден пациент, кога во болницата избувнал пожар. Но, наместо да се евакуираат, храбрите лекари решиле да продолжат со операцијата и да го спасат нивниот пациент.

Во болница изградена пред 114 години, која е лоцирана во рускиот град Благовешченск, неколку лекари само што почнале со операција на отворено срце.

Но набрзо потоа, во болницата избувнал пожар. Лекарите и медицинските сестри кои биле во операционата сала наместо да се евакуираат, одлучиле дека мораат да продолжат со операцијата.

Храбрите лекари сметале дека нивната должност е да завршат со операцијата и да му го спасат животот на пациентот.

„Секако дека бевме исплашени. Луѓе сме. Но, не можевме да заминеме. Моравме да го спасиме пациентот. Останавме да продолжиме со операцијата. Зарем вие би направиле нешто друго?“, изјави главниот хирург – 29-годишниот Валентин Филатов.

Според неговата изјава, тие правеле бајпас операција и не смееле да си дозволат да ја напуштат салата.

„Не требаше да одлучуваме. Операцијата мораше да продолжи и ја направивме до крај“, споделува доктор Валентин.

На фотографиите споделени од руските медиуми се гледаат пламените на покривот од болницата и пожарникарите кои се обидуваат да го изгаснат пожарот. Наводно, пожарникарите евакуирале 67 пациенти и околу десетина медицински лица од болницата додека траела операцијата на тимот на доктор Валентин.

Операцијата звршила успешно, а веднаш потоа пациентот бил пренесен во друга болница.

Подоцна, и градоначалникот на градот се огласил за настанот, восхитувајќи се на херојството на храбрите лекари, а наводно тие треба да добијат и награда за нивниот неверојатен подвиг.

Осумте медицински лица од Русија се доказ дека за лекарите нема ништо поважно од нивните пациенти, дури и ако тоа значи дека треба да го ризикуваат својот живот.

Спирова С. | Црнобело