Како во старите, добри времиња: Во Ливерпул се одржа „пилот“ фестивал без маски и дистанца (фото+видео)

Детали

вторник, 04 мај 2021

Додека ние за викендот ги славевме првомајските и велигденските празници во домашна атмосфера, во Обединетото Кралство во Ливерпул се одржа „пилот“ фестивал без маски и без социјално дистанцирање. Ако се суди според објавите на социјалните мрежи тоа било ноќ за паметење – исто како во старите добри времиња.

Во рамки на „пилот“ фестивалот се собраа околу 5.000 посетители, што воедно е најголемиот број на луѓе собрани на едно место во последните 13 месеци, односно од почетокот на пандемијата.

Речиси и да заборавивме како изгледа на едно место да се собрани толку многу љубители на музиката, кои уживаат во добра музика, пијалаци и добра забава, но и во прегратки, танцување и физички контакт.

Како што пишува BBC, овој фестивал е еден од пробните владини проекти во Обединетото Кралство чијашто цел е да обезбеди податоци за идните групни собири.

Сите посетители еден ден претходно морале да направат тест во еден од четирите центри наменети за тоа и им било дозволено да присуствуваат само доколку тестот бил негативен.

Исто така, им било препорачано да направат тестирања на денот на фестивалот, но и пет дена подоцна, односно следниот петок (7-ми мај). Овие податоци ќе бидат неопходни за да се увиди дали вирусот се проширил.

Освен толпата што имала цел само да се забавува, на фестивалот биле присутни и научници кои ги проучувале и другите фактори како: движење, комуникација, вентилација, времетраење, кетеринг и консумација на алкохол. Забележителни биле и луѓе со папки кои постојано воделе белешки.

Ова е со цел да се добијат податоци на кој начин би можела да се отвори сезоната на летни фестивали по 21-ви јуни кога теориски би требало да бидат завршени и рестрикциите за социјален контакт.

Повеќе фотографии и видеа од настанот во продолжение:

Б. С. Б. | Црнобело / фото: Инстаграм/Твитер