Имав вонматерична бременост и ми рекоа дека никогаш нема да бидам мајка – потоа открија дека имам и второ бебе-херој

Детали

сабота, 07 август 2021

Бет и Луис Ричардсон се родители на малата Миреја, која за чудо ја преживеала операцијата за отстранување на вонматеричната бременост на нејзиниот близнак, а му дала и волја на нејзиниот татко да се избори со канцерот.

Бет Ричардсон (27) и нејзиниот сопруг Луис (28) од Англија се запознале кога имале 12 години, а почнале да се гледаат во октомври 2018-тата година.

Бет имала операција на јајчниците и ѝ било кажано дека ќе има проблеми со забременување. Во јуни 2020-тата таа била итно пренесена во болница со големи болки и лекарите утврдиле дека има вонматерична бременост по што итно ѝ била направена операција.

По ова, лекарите ѝ рекле дека никогаш нема да остане бремена, а никој не очекувал дека е возможно таа да била бремена со близнаци и едното дете да се изборило за живот.

„По два дена ми направија анализа на крвта и резултатите покажаа дека сè уште сум бремена. За чудо кога ми направија ехо-преглед, во мојот стомак имаше близначка што безбедно растела. Таа ја преживеала операцијата без воопшто да знаеме дека била таму“ – вели Бет.

Мислеле дека конечно им се насмевнала среќата, но само неколку недели пред нивната свадба Луис открил израсток на вратот. Првично мислеле дека се работи само за инфекција, но, во октомври 2020-тата година, само четири дена откако се оженил со неговата бремена свршеница тој дознал дека боледува од Хоџкин-ова лимфома, редок вид на карцином на крвта.

По ова следел мошне тежок период. Бет постојано крварела во бременоста, поради што морала да оди на чести прегледи и ѝ било забрането да се движи, а Луис бил на третман со хемо-терапија. Но, по тешкиот период конечно се случило и нешто убаво.

Во февруари годинава тие ја добиле ќерката Миреја, а три дена подоцна Луис завршил со третманите за канцер и оттогаш е излекуван. Името на нивната ќерка во шпанскиот јазик означува „чудо“, а по бројните проблеми, станува јасно зошто оваа двојка се одлучила токму за ова име.

„Миреја е нашето чудо. Таа ја преживеа операцијата за отстранување на вонматеричната бременост, а потоа му даде сила на Луис за да се избори со канцерот. Претрпевме голема тага и голема радост во минатата година и сега сакаме да уживаме во секој миг со нашето бебе, се чувствуваме благословено“ – вели Бет.

Што е ектопична (вонматерична) бременост?

Кај нормалната бременост јајце клетката се оплодува во јацеводот и потоа патува до матката, каде ќе се всади, а кај ектопичната (или вонматерична) бременост доаѓа до всадување или имплантација на ембрионот надвор од матката.

Најчесто кај вонматеричната бременост импланацијата е во еден од јајцеводите, а многу поретко може да се случи ембрионот да се всади: во стомачната празнина, надворешно на матката, во јајниците или на друго место.

Лекарите тврдат дека во ниту еден случај нема услови за одржување на бременоста. Како што расте ембрионот доаѓа до пукање на јајцеводот или другите органи, тешко крварење и го доведува во опасност животот на жената.

Б. С. Б. | Црнобело