Војна, глад, бесмртност – што предвидел Нострадамус за 2022 година?

Детали

четврток, 03 март 2022

Пред да почнете да ги читате пророштвата, запомнете дека тие биле пишувани во стихови и никој не може да биде 100% сигурен дека го открил нивното значење. Во продолжение погледнете кои настани се смета дека се поврзуваат за 2022 година.

За време на секоја поголема криза во светот, луѓето често се навраќаат на пророштвата на најпознатиот пророк од 16-иот век Нострадамус и се обидуваат во неговите загадочни стихови да ги откријат претскажувањата за тоа што ни се случува.

Се вели дека францускиот пророк го предвидел големиот пожар во Лондон од 1666-та година, како и доаѓањето на власт на Хитлер, за кого предвидел дека ќе дојде од народот и со моќта на говорот ќе заведе голема маса на народ.

Освен тоа, оние што ги проучуваат неговите толкувања тврдат дека во загадочните стихови на Нострадамус може да се најдат предвидувања и за атомските бомби фрлени врз Хирошима и Нагасаки, како и за атентатот врз американскиот претседател Џон Кенеди.

Но, што се предвидувањата за 2022?

Додека целото внимание во светот е свртено кон случувањата во Украина, повторно почнуваат да се појавуваат написи кои велат дека Нострадамус ја предвидел војната, а голем број луѓе се свртуваат кон познатата книга на Нострадамус од 1555-та година позната како „Пророштва“.

Нострадамус кој бил поканет од страна на Катерина де Медичи на францускиот двор за да ги прави наталните карти на нејзините деца, во 1547-ма година почнал да ги пишува своите пророштва во катрени (строфи од по четири стиха) со задолжителна рима, а во книгата тие се поделени во делови од по 100 стиха наречени „век“.

Тој уште додека бил жив бил озлогласен затоа што сметале дека неговите пророштва секогаш се остваруваат.

Погледнете во продолжение што предвидел францускиот пророк за 2022-ра година, но мора да имате на ум дека неговите пишувања честопати се конфузни, па речиси никогаш никој точно не можел да утврди што тој сакал да каже.

Најчесто неговите пророштва се врзуваат за одредени големи настани откако ќе се случат, но и тоа најчесто се зема со резерва и речиси секогаш сѐ се сведува на претпоставки.

Трета светска војна

Според пророштвата на Нострадамус, Франција најверојатно ќе биде погодена со опасност од исток, по што ќе следи долга и масивна војна со траење од 25 до 29 години, која ќе биде проследена со повеќе помали војни.

Францускиот пророк вели дека по ова ќе дојде добата на „Сатурн“ односно период од 1000-годишен мир.

Удар од астероид 

Ударот од астероид ќе предизвика масовна смрт. Според него небесен пламен ќе падне од небото, а оние што ги толкуваат неговите пророштва сметаат дека тој предвидел дека Земјата ќе биде погодена од повеќе астероиди што ќе предизвикаат пожари и уништувања.

Да се потсетиме дека во повеќе наврати Земјата имаше „блиска средба“ со астероиди со големина на автобус, а во 2013-та година светот остана во шок кога на 15-ти февруари Чељабинск во Русија беше погоден од огромен метеор.

Глобално затоплување

По сè изгледа уште во 1555-та година Нострадамус предвидел дека Земјата ќе се затопли толку многу што рибите ќе излегуваат сварени од морето.

Според него, луѓето нема да видат дожд цели 40 години, а кога конечно ќе заврне, ќе следат поплави што ќе уништат цели нации.

За потсетување Обединетите Нации веќе предупредија дека Земјата ќе се затопли за 1,5 степени во следните 20 години, односно една деценија порано од претходните предвидувања.

Пад на економијата и глад

Нострадамус предвидел дека поради растот на цените и зголемената инфлација луѓето ќе почнат да гладуваат.

Како што вели, луѓето ќе плаќаат за тоа што не научиле од минатите грешки, а цените само повеќе ќе растат и ќе предизвикаат глобален глад.

Развој на вештачката интелигенција

Развојот на вештачката интелигенција е честа тема во последните 20-тина години, а францускиот пророк за ова говорел уште во 1555-та година.

Неговите толкувачи тврдат дека во едно од своите пророштва тој вели дека луѓето ќе станат бесмртни благодарение на вештачката интелигенција.

Б. С. Б. | Црнобело