Мало девојче го трогна светот пеејќи ја Let It Go во подземно засолниште во Киев: „Ни мажите не ги криеја солзите“ (видео)

Детали

вторник, 08 март 2022

Мало девојче го остави светот без зборови со емотивната изведба на песната Let it Go од подземно засолниште во Украина. Видеото го споделија и авторката на песната и пејачката што ја изведуваше за анимираниот филм Frozen.

Мало девојче од Украина го трогна светот со нејзината изведба на популарната песна од анимираниот филм Frozen во подземно засолниште во Киев.

Видеото првпат беше објавено на 3-ти март од Марта Смекова, жена која била во засолништето со девојчето, а викендов стана вирално и уште активно се споделува на сите социјални мрежи.

Во описот, жената вели дека ги гледала децата како пробуваат да се забавуваат и да си го исполнат времето во засолништето со активности како цртање, кога почнала да разговара со девојчето кое ѝ рекло дека многу сака да пее.

Тогаш таа ѝ предложила да запее за сите во засолништето и иако девојчето се двоумело, сепак се согласило.

„Од првиот стих, во засолништето имаше комплетна тишина. Сите престанаа со она што го работеа и го слушаа девојчето кое зрачеше. Дури ни мажите не можеа да ги скријат солзите.

Го направив видеото со дозвола од мајката и ветив дека ќе го видат многу луѓе!“, вели Марта во описот.

Емотивното видео се прошири толку многу, што допре и до авторката на песната Let it Go која го сподели на нејзиниот Твитер профил.

„Драго мало девојче со прекрасен глас, јас и сопругот ја напишавме ова песна како дел од приказна за семејство кое закрепнува од болката. Начинот на којшто ја пееш е како магичен трик кој ја шири светлината во твоето срце и им помага да закрепнат на сите кои те слушаат. Продолжи да пееш! Ние те слушаме!“, стои во описот.

Видеото беше споделено и од пејачката што ја изведуваше песната за анимираниот филм – Идина Мензел - со опис: 

„Те гледаме. Навистина те гледаме“.

Спирова С. | Црнобело