Приказната за Американка која сопругот ја полеа со бензин и ја запали – како изгледа денес, по 13 години? (фото)

Детали

петок, 08 април 2022

„Тој успеа да ми ја земе само надворешната убавина, денес кога ќе се погледнам во огледалото гледам самоуверена жена“ – вели Одри Мабреј, Американката која беше брутално нападната од нејзиниот сопруг во 2009-та година.

Одри Мабреј денес е инспирација за сите жртви на семејно насилство. Таа гласно говори за сопственото ужасно искуство со насилниот сопруг и се обидува колку може повеќе да ја поткрене свеста за овој проблем и да им помогне на жртвите.

Пред 13 години, Одри на 27-годишна возраст, додека живеела во Флорида (САД) и самата била жртва на насилниот и љубоморен сопруг Кристофер Ханеј кој претходно постојано ја обвинувал дека има афери и дека се гледа со поранешното момче во Канзас.

Тие неколку месеци биле разделени, а таа живеела посебно заедно со нивните две деца.

Една вечер отишла во нивниот претходен дом, верувајќи дека нејзиниот сопруг Кристофер не е дома. Тој ја нападнал со нож, ја одвлекол во гаражата, каде ѝ ги врзал рацете и се обидел да ја силува. Потоа ја удрил 4 пати со чекан по главата, ја полеал со бензин и ја запалил со свеќа.

По ова, Хенеј наводно се вратил во куќата и се обидел да се самоубие. Одри успеала да се ослободи, да стигне до соседите и да повика помош.

По бруталниот напад Одри била ставена 6 месеци во индуцирана кома, а кога се разбудила била шокирана од повредите на нејзиното тело и изгледот на нејзиното лице.

Во нападот таа се здобила со изгореници од втор и трет степен на 80 отсто од нејзиното тело.

„Тој ден тој успеа само да ми ја земе надворешната убавина и да ми нанесе лузни, но тоа е сѐ што успеа да ми земе. Нема да му дозволам да земе уште нешто од мене“ – рече таа во интервју една година по нападот.

По ова следел долг процес на терапии и операции кои ја оставиле во огромни долгови. За седумте операции Одри требала да плати 100.000 долари.

Благодарение на помошта што во 2013-та година ја добила од добротворната организација Face Forward предводена од жртвата на семејно насилство Дебора Алеси и нејзиниот сопруг Дејвид Алеси кој е пластичен хирург, Одри конечно успеа да си го врати изгледот.

„Кога ќе погледнам во огледалото, гледам само убава и самоуверена жена“ – вели таа.

Нејзиниот сопруг беше обвинет за насилен напад, обид за убиство и подметнување пожар.

За време на судењето во 2012-та година Ханеј тврдел дека е невин и дека Одри се обидела да го нападне со помош на маскиран маж.

Сепак овие информации веднаш биле отфрлени, а тој добил доживотна казна затвор за обид за убиство, 30 години затвор за подметнување пожар и уште 30 години за насилен напад.

Одри денес живее во Колорадо Спрингс заедно со нејзниот сопруг Дејвид Проспер и двете деца.

Погледнете повеќе нејзини фотографии:

Б. С. Б. | Црнобело