„Дознав дека дечко ми има девојка, ја лажел и неа – сега сме пријателки, си бевме на Костарика“

Детали

вторник, 04 октомври 2022

Девојка од САД сакала да оди на роденденско патување во Костарика со саканиот, но откако дознала дека паралелно тој имал друга девојка, таа се здружила со неа и двете изневерени си отишле на одмор за да се тешат. Го оставиле измамникот и си поминале совршено. Фејт и Емили ги споделуваат деталите за медиумите...

Фејт Бистлајн од САД била возбудена дека за 30-тиот роденден ќе оди на патување во Костарика со момчето, но неколку седмици пред да заминат добила вознемирувачка порака.

„Дали тоа е твое момче? - било напишано заедно со фотографија која таа пред 18 месеци ја имала прикачено на социјалните мрежи, на која била со саканиот.

Затоа што ако е така, да знаеш дека тој веќе 10 месеци се состанува со моја пријателка...“

Бистлајн не можела да поверува во пораката и мислела дека е грешка.

Таа направила скриншот од разговорот и му го пратила на партнерот. Тој ја видел пораката, но не ѝ одговорил.

Фејст дознала дека нејзиниот партнер паралелно бил во врска со Емели Ортиз (22) од САД. Дури и Емили ја контактирала и ѝ потврдила дека е со него речиси една година, но дека верувала дека таа му е единствена девојка.

Емели Ортиз (лево) и Фејт Бистлајн (десно)

Тие почнале да разговараат за деталите и сфатиле дека двете се измамени.

Дечкото со кој се состанувале двете истовремено, имал 33 години и работел во здравствениот систем, а живеел во Лас Вегас.

Девојките продолжиле да се допишуваат и да си испраќаат фотографии со него направени во текот на нивните врски, па дури и такви каде тој се запознава со нивните семејства.

Во наредните неколку дена откако сфатиле дека се сериозно изиграни - раскинале со него. Тој откако бил фатен, не им кревал на телефон на двете.

Почнале да се тешат една со друга, а откако Фејт ѝ кажала на Емили за роденденското патување за кое платила, а сега ќе ѝ биде уништено, донеле одлука заедно да одат на Костарика.

„По ова ни е потребен одмор, сериозна сум со идејата да одиме заедно на Костарика“, ѝ рекла Фејт на Емили и три седмици откако дознале за тоа како се изневерени и излажани, заедно отишле на одмор.

„Прво, ми личеше како луда идеја, но потоа си помислив дека ќе биде добро да закрепнуваме заедно затоа што ние две единствено знаеме низ што минавме и како се чувствуваме во врска со тоа.

Минавме денови истражувајќи ја џунглата и неверојатните водопади, работевме на тоа да го исфрлиме од себе бесот и чувството дека сме предадени и седевме со часови во прекрасна природа и си разговаравме“, вели Емили.

Двете девојки сега се пријателки, а мажот што ги изиграл е минато.

И двете се согласуваат дека уште кога го запознале им изгледал како „женкар“ и од оваа перспектива не знаат зошто верувале дека може да имаат среќна и хармонична врска со него.

Двете велат: „Не се сеќаваме кога последен пат сме биле толку среќни како при заедничките авантури на Костарика. Пријателството е сè и може да направи да ги надминете и најтешките мигови. Секогаш во животот слушајте ја вашата интуиција.“

С. С. | Црнобело / фото: depositphotos.com