Исповед на мајка: „Се породив во такси, дома ми стигна сметка за чистење на возилото“

Детали

среда, 02 ноември 2022

„Ми пукна воденикот и веднаш се породив. Сметам дека е безобразно да ми наплатат за чистењето“ – вели жената што ненадејно се породила во такси додека одела на преглед. Што мислите вие, кој треба да плати за чистењето – компанијата или патничката?

Само неколку дена откако станала мајка, Фара Каканиндин од Англија останала во шок откако дома добила сметка во висина од 90 британски фунти за чистење на возилото и за превозот.

Како што пренесува британскиот весник The Sun оваа 26 годишна жена влегла во такси и требало да патува околу 20 километри за да оди на рутински преглед за бременоста, но само 5 минути по влегување во возилото почувствувала дека ѝ пукнал воденикот и веднаш почнала да се породува.

„Тоа беше најбрзото породување. Ми пукна воденикот 5 минути откако влегов во таксито. Таксистот ме праша дали сакам да застане, но јас му реков да продолжи да вози затоа што верував дека ќе успееме да стигнеме пред бебето да се роди“ – вели таа.

Сепак, Фара се породила сосема сама на задното седиште од автомобилот, а таксистот се јавил во болницата за да го најави нејзиното доаѓање.

Кога стигнале во болницата веднаш ја пречекале бабици и биле шокирани кога виделе дека Фара ја носи ќеркичката Наја завиткана во својот капут.

Сега оваа жена ја споделува својата приказна во медиумите и открива дека неколку денови подоцна кога се вратила дома со бебето била мошне изненадена затоа што на домашна адреса добила сметка од 90 британски фунти, од кои 30 биле сметка за возењето, а дополнителните 60 биле за трошоците за чистење на возилото.

„Јасно ми е дека направив неред, но сметам дека е безобразно тоа што ми наплаќаат за чистење“ – вели таа.

Што мислите вие? Кој треба да ја плати сметката за чистење на возилото?

Б. С. Б. | Црнобело