„Родив близнаци, но од финансиски причини морав едната ќерка да ја дадам на посвојување – сега не сака ниту да ме види“

Детали

среда, 16 ноември 2022

„Имав прекрасна ќерка, но не можев да престанам да мислам на моето бебе што не беше во моите раце“ – вели оваа 60-годишна жена од САД која 20 години криела дека се откажала од едното од своите близначиња. Кога конечно повторно ја нашла загубената ќерка, не очекувала дека повторно ќе мора да се откаже од неа.

Даун Ворис (60) од Индијана, САД, морала да се соочи со мошне тешка одлука во 2000-тата година кога при лекарски преглед за бременост дознала дека ќе стане мајка на близначиња.

Свесна дека таа и сопругот Клинт немаат доволно финансии да се грижат за две бебиња одлучиле да контактираат агенција за посвојување и едно од бебињата да го дадат на посвојување.

„Многу ги сакав двете деца, но знаев дека нема да можам да им го дадам животот што го заслужуваат. Не можев да јадам, да спијам или да се фокусирам на работата. Не кажавме никому дека очекуваме близнаци, дури ниту на мојата мајка.

Во меѓувреме сите стравови за иднината ме измачуваа“ – раскажува Даун која открива дека уште пред бременоста била анксиозна и загрижена за тоа како финансиски ќе издржат со нов член во семејството.

По долги разговори со вработените во агенцијата за посвојување, Даун и Клинт нашле соодветни родители за нивното бебе, а таа за време на целата бременост криела дека носи две бебиња.

Во 2001-ва година ги родила ќеркичките Микајла и Беки, а вели дека си дозволила самата на себеси да го задржи едното бебе само неколку минути пред да им го даде на сестрите да го однесат во инкубатор.

Но, како што вели, целиот живот имала грижа на совест додека гледала како едната ќерка Микајла расте со нив, а другата Беки морала да ја даде.

„Имав прекрасна ќерка, но не можев да престанам да мислам на Беки, моето бебе што не беше во моите раце, што не беше до својата сестра“ – вели таа, а состојбата била толку лоша што Даун добила и лекови за постпородилна депресија.

Таа вели дека со години ја криела тајната од сите, а во еден период кога финансиската состојба им била подобра, воопшто и не сакала да помисли на второ дете затоа што чувствувала грижа на совест затоа што се откажала од Беки.

Во декември 2020-та година, нештата се промениле кога Даун добила порака од агенција за наоѓање на вистинските родители на посвоените деца, во која пишувало дека Беки сака да ги запознае.

„Се договоривме да ја видиме Беки во кафуле што беше на половина пат помеѓу нашите домови. Бев мошне возбудена додека ја чекавме и кога влезе видовме дека изгледа исто како Микајла“ – вели таа.

Разговорот поминал во најдобар ред, но Даун и Клинт требало да ѝ ја кажат вистината и на другата ќерка Микајла која била пресреќна од вестите.

Двете сестри почнале да се гледаат и редовно да разговараат и на прв поглед сѐ изгледало во ред, сѐ до 20-иот роденден на девојките кога Даун сакала да организира роденденска забава.

Во тој период Беки престанала да комуницира со нив, а Даун верува дека причините се затоа што почнала да се чувствува отфрлено и не верувала дека финансиите се вистинската причина зошто ја дале на посвојување.

„Се чувствувам како да ја загубив двапати. Но, можам само да ја почитувам нејзината желба да не ја контактирам и да се надевам дека еден ден повторно ќе бидеме сите заедно“ – вели Даун.

Б. С. Б. | Црнобело