Моќна порака на мајка од Сиднеј: „Зошто на моите деца нема да им купам новогодишни подароци?“

Детали

четврток, 15 декември 2022

Таа смета дека наместо материјални работи, кои ќе им здодеат за 3 дена, на децата треба да им „подарува“ искуства, кои ќе ги помнат цел живот. Совршена филозофија, зарем не?

Шерил Су (39) од Сиднеј е мајка на две деца која вели дека одлучила на нејзините деца да не им купува никакви новогодишни и божиќни подароци и годинава.

Зошто? Затоа што наместо материјални работи вели дека сака да им „подарува“ искуства секоја година.

Таа никогаш за празниците не им купувала подароци на 4-годишниот син и 2-годишната ќерка, иако семејството нема проблем со финансиите.

Но, и покрај ова нејзините деца веруваат во Дедо Мраз и семејството ги слави празниците.

„На моите деца со сопругот им објаснивме дека Дедо Мраз е многу зафатен и дека тој сака да дава подароци на децата, но бидејќи тие се деца кои имаат многу работи и имаат сè што им треба, тој мора да се концентрира на некои деца кои немаат толку многу во животот.“

Наместо да ги опсипува со подароци, Шерил верува дека подобро е со нејзините деца да отпатува некаде за празниците или да минат ден сите заедно на плажа.

„Ние ги цениме искуствата повеќе од материјалните работи. Радоста на детето за некоја играчка брзо ќе исчезне, но искуствата ќе ги помнат со години.

Ќе помнат кога сите заедно сме оделе на одмори, во тематски паркови, зоолошки градини или сме искусувале некои незаборавни авантури.

Jас не ги осудувам другите кои купуваат играчки, едноставно јас сакам на моите деца да им креирам спомени на цел живот, наместо да ги трошам парите на играчка која ќе ја заборават за 3 дена.“

Интересна филозофија на функционирање, зарем не?

Вие за што сте – за искуства или за материјални работи?

С. С. | Црнобело