Браво! Пензионер од Англија магистрирал на 74 години, 35 години откако завршил факултет

Детали

понеделник, 09 јануари 2023

Цели 35 години откако дипломирал, Џон од Англија решил да го продолжи образованието, па годинава успеал да магистрира. Сега тој се надева дека неговата приказна ќе ги инспирира другите да ги следат своите соништа, без оглед на нивната возраст.

Џон Вилшер од Англија има 74 години и дури неодамна магистрирал.

Тој е пензионер кој работел како наставник во основно училиште и смета дека е одличен пример за сите кои не успеале да ги остварат своите цели во младоста.

Во Англија, во последната година од основно училиште, некои ученици полагаат испит по неколку предмети, како математика и англиски јазик.

Со резултатите од овие тестови, тие аплицираат во средно. Но, Џон паднал на овој испит, па речиси целосно кренал раце од високото образование.

Подоцна Џон го положил испитот и завршил средно, а потоа се вработил како наставник. Додека работел, успеал да заврши и факултет.

„Додека предавав, учев за факултетска диплома, потоа се запишав на постдипломски студии во областа на образованието. Изгледа учењето додека работам е во мојата ДНК“.

Тој не ги довршил постдипломските студии и со години сметал дека нема потреба да продолжи понатаму со своето образование. Но во 2021-ва си го сменил мислењето и се запишал на магистерски студии и се фокусирал на климатските промени.

„Поминав тренинг за наставник по географија и науката отсекогаш ме интересирала. Климатските промени се проблем што треба да нè засега сите“.

Тој почнал да оди на предавања во септември минатата година, а добил и финансиска помош од државата поради неговата возраст.

„Без финансиската помош, нема да можев да си ги дозволам студиите со мојата мала пензија“, вели Џон.

Па, неколку децении подоцна, Џон конечно се вратил на училиште.

„Имајте на ум дека последниот час по географија го слушав во 1969 година, а последен пат полагав испит во 1987 година“.

Иако Џон е вреден ученик, вели дека воопшто не било лесно да го продолжи образованието на негова возраст. Сепак, бил пријатно изненаден од поддршката што ја добивал од сите околу него.

„Како постар маж кој полага испит првпат по 35 години, и со меморија која не е добра како порано, бев загрижен. Сепак, штом ги споделив моите грижи со еден професор, веднаш беа преземени мерки за да ми го олеснат учењето“.

Сега Џон се надева дека неговата приказна ќе ги инспирира другите да не се откажуваат од своите соништа, без разлика на возраста.

„Требаше да надминам многу пречки, како испуштени можности поради паднатиот испит во основно. Но, овие пречки не ви го одредуваат животот.

Времето минува многу брзо, особено ако имате повеќе од 60 години. Па, ако сте заинтересирани за нешто, фокусирајте се на крајната цел, а не на минатите тешкотии“.

Спирова С. | Црнобело