Скопската шема во „наше време“: Каде излегувавме во 90-тите? (фото)

Една позитивна страна на чистењето по дома, е што секогаш можете да наидете на стари спомени кои ако ништо друго барем за момент ќе ве вратат во минатото.

Низ фиоките сигурно ќе налетате на тетратки кои сте ги користеле како „дневник“, збирка поштенски марки, збирка салфетки и ливчиња „Детска пошта“, гратиси и позивници за дискотеки.

Токму гратисите и флаерите се инспирација за оваа статија. Родените во 80-тите сигурни ќе се сетат на дел од овие промотивни материјали.

Во „наше време“ без „позивница“ не се влегуваше во диско. Ако не се лажам, мислам дека не постоеја ни тајните „списоци“ на врата.

Мангуп си ако се знаеш со менаџерите (можеби дел од нив ќе се пронајдат низ флаерите затоа што требаше да се потпишат, па да се види кој колку луѓе носи во диското). Ама убаво беше.

Листајќи ги „позивниците“ за Булевар, Мусандра, МНТ, Манда Роса, Сачмо – ќе се сетите на дел од овие убави ноќи.

Во ова време беше измислена и „медиум“ забавата. Се знаеше кој, кога и каде излегува.

Во дискотеки се пушташе диско музика. Денес треба да си среќен ако си во диско и не слушаш српска певаљка или некој новопечен бенд кој те труе со турбо фолк – а, нема нешто понеприродно од тоа да влезеш во диско и да слушаш Џеј или Шабан Шаулиќ шема.

И имаше избор, разноликост во излегувањата. Во една вечер можеше да отидеш на 5-6 места и секаде да си поминеш топ. За волја на вистината – не постоеше ограничено работно време на кафичите, но сепак околу 12 сите се придвижуваа кон дискотеките.

Факт е и дека луѓето беа поспокојни и постоеше вистинска желба за забава – денес фиксното стоење на подиум пред 20-25 години беше играње и уживање во музиката.

Да не должиме многу, а и повеќе за скопската шема во ова време можете да прочитате на овој линк, а за сега – едно фото потсетување на забавите од „наше време“.

 Е.П. | Црнобело