8 причини и традиции заради кои го сакам Бадник

Утринско будење со детски џагор, песна „Коледе-леде“ и дарување коледарчиња, па подготовка на бадниково лепче со паричка заедно со мајка ми, а потоа заминување пред Соборниот храм во Скопје, по бесплатно бадниково гранче и топол пијалак - традиција која трае со години. Зошто го сакам Бадник?

Божиќните празници навистина се едни од најубавите, а во моето семејство отсекогаш се практикувало да сме дома во овој период и сите на куп да ги поминуваме овие денови во радост и спокој. 

Додека некои се одлучуваат за патувања и прошетки, јас ги сакам сите традиции кои доаѓаат со празниците, посебно на Бадник, а потоа и на Божиќ, заедничките ручеци со поширокото семејство, што е најголемото богатство на кое сум посебно горда. 

Одвреме навреме треба да се присетиме на вистинските вредности во животот кои ќе се пренесуваат со љубов и на следните генерации. 

Има некоја посебна магија во празниците, а во продолжение издвојувам неколку причини и традиции поради кои го сакам Бадник (верувам дека многумина ќе се пронајдат): 

- Неколку дена претходно се оди на семејно пазарење за поголеми количини овошје, суви плодови, чоколатца и бонбони за подготвени да ги дочекаме коледарите на бадниковото утро

- Будење в зори на бадниковото утро со ѕвонче на врата, детски џагор, смеа и песна „Коледе-леде“, па дарување на дечињата (иако сè поретки се децата кои коледарат)

- Месење на бадниковото лепче со паричка – некогаш ѝ помагав на мајка ми во кујна, а денес таа ми дава совети преку камера како да го направам сама

- Одење со блиските пред Соборниот храм во Скопје каде Бадникарското друштво дели бесплатни гранчиња и топол пијалак за граѓаните – семејна традиција која трае 3 децении, а крие емотивна приказна

Прочитајте повеќе: Приказната на скопските бадникари кои 30 години се пред Соборен храм

- Поставување на бадниковата трпеза со домашно зготвени посни јадења и секако, светеното бадниково гранче

- Семејството е на куп, уживање во заедничка вечера и исчекување кај кого ќе се падне паричката – иако сме возрасни, секогаш постои доза на радост кога ќе ја видиш во своето лепче

- „Кај и да си – за Бадник дома да си“ – традиција која во моето семејство секогаш строго се почитува и никогаш никој не недостасува, освен оној кој прерано си замина од овој свет

- По вечерата, слатко најадени, секако трпезата се остава да преноќи, а цело семејство е пред телевизор, под ќебе и гледа божиќен филм

©CRNOBELO.com Забрането преземање и копирање. Крадењето на авторски текстови е казниво со закон.

М. М. | Црнобело

Фото: приватна архива / depositphotos.com