Патот за Авонли - спомени од детството

Неодамна случајно налетав на некоја епизода од „Патот до Авонли“. Ова беше една од сериите на моето детство.

Беа тоа времиња кога и на распуст имавме причина плус да станеме во 8.30 за да ја изгледаме дневната доза од секојдневието на Сара и Џо Питс, Гас Пајк, Фелисити, Сесили, Хети Кинг. Авонли беше едно идилично гратче во кое сите си живееја по своја приказна.

Ми текнува уште на првата епизода, кога ја донесе татко и на Сара во Авонли - колку ја мразев Хети тогаш за потоа да стане еден од омилените ликови!

Патот за Авонли е најгледаната канадска серија на сите времиња. Како потврда на големата популарност и квалитет ,серијата има освоено 15 ЕМИ награди и безброј меѓународни пофалници.

На кратко:

Сара е главен лик во првите сезони кога живее и учи во Авонли, каде Хети предава како учителка во училиштето за потоа да замине во Европа на патување и на крајот да се врати во последната епизода.

По заминувањето на Сара, Хети ќе ги посвои близнаците Дејвид и Дора. Оливија е тетката која секогаш ќе дава најдобри совети, која работи како новинарка во почетокто и така го запознава чудниот и несмасен Џаспер и се жени со него.

Алек и Џенет Кинг живеат со своите четири деца на фарма близу куќичката на Хети и Оливија. Нивната најстара ќерка Фелисити од мала го живее светот на возрасните, поставувајќи се супериорно над другите деца и во почетокот е постојано љубоморна на братучетката Сара. Понатака таа се вљубува во рибарот Гас Пајк и на крајот се мажи со него и основа сиропиталиште за деца во Авонли.

Феликс е најнемирното дете од фамилијата Кинг, тој е темпераментен, често запаѓа во неволји и прави глупости. Во текот на серијата, тој се вљубува во Изи, девојка која сака да стане женски офицер, а на крајот, Феликс заминува да работи во морнарица.

Сесили е најмирната ќерка на семејството Кинг, таа е целосно посветена на фармата и чувањето на најмалото братче Даниел, а во текот на серијата, се разболува од туберколоза и оди на лекување во санаториум.

Гас Пајк е морнар, кој живее лесен едноставен живот и е во постојана потрага по неговите родители. Тој се вљубува во Фелисити, меѓутоа по еден ураган, сите мислат дека е мртов. На крајот на серијата, го пронаоѓаат и серијата завршува со венчавката на Фелисити и Гас.

Цело едно детство, цела една бура од спомени ми враќа патот кон Авонли!

Е.П. | Црнобело