Фрлете ја паричката во воздух!

Надежи, соништа, несполнети желби... Животот се состои од сето тоа, во спротивно не би бил интересен. Што кога би имале сè што посакуваме? Тогаш нема да имаме желби и соништа кон кои ќе се стремиме секој ден се додека не ги постигнеме.

Во меѓувреме, на патот до нашите желби, соништа, љубовни ситуации и пријателски односи секогаш треба да донесуваме одлуки дали да тргнеме кон левата или десната кривина, но ретко кога сме сигурни дека одлуката е правилна доколку патот го гледаме за прв пат, а патокази нема никаде.

Кога разумот и срцето се борат помеѓу себе, колуминацијата и перипетријата во полно светло ни ги насолзуваат очите од блесокот, ни ја отежнуваат мислата и ние не знаме што да правиме повеќе, во тој момент треба да се препуштиме на случајноста или така наречената судбина.

Тогаш е време да ја фрлиме паричката во воздух!

Добро слушнавте, земете паричка, погледнете ги нејзините две страни и поставете си го прашањето за кое треба да донесете одлука.

Доколку се двоумите помеѓу две работи, петката именувајте ја со едната работа, главата со другата работа. Оставете едно од нив да ви помогне во донесување на одлуката.

Сега, фрлете ја паричката во воздух...

Срцето ви затреперува, почнувате да се прашувате што ќе се падне...

Тука е одговорот!

Која од двете работи помеѓу кои се двоумевте помисливте дека ќе се падне?

Тоа е таа вистинската. Вие уште пред да ја фрлете паричката сте знаеле која одлука е правилна бидејќи човечката интуиција никогаш не греши.

Нема потреба да погледнете што се паднало, вашето срце веќе ја знаело вистинската одлука кога паричката била во воздух.