Наместо невкусни коментари, подарете ѝ цвеќе на вистинската жена

Преку глава ми е да слушам глупави шеги за жени во менопауза.

Кога мажот е во таа фаза, почнува да беснее како тинејџерче, купува автомобил или мотор што не може да си го дозволи, почнува да загледува млади жени и се идентификува како фраер.

Во принцип е патетичен.

Кога жената е во менопауза се доживува како бесна, невротична и опсесивно луда, а во принцип е реална.

Жените во Македонија се особено храбри. Бестрашни. И ја заслужуваат секоја пофалба и секое зрно почит. Па дадете им погача.

Познавам неверојатни жени. Работат полно работно време, ги разнесуваат децата на сите активности.

Одат на досадни родендени за љубовта на децата, а веројатно сè што сакаат е да се опуштат со масажа или добра чаша вино. Но сеедно, одат и се смешкаат, затоа што така налагаат правилата.

Ги паметат сите важни датуми, дежурни купувачи на подароци за целото семејство, вклучувајќи го и она на мажот.

„Не ми треба мене потсетник, си ја имам жена ми“, неодамна слушнав коментар од еден маж. Барем си призна човекот.

Ручекот е секогаш на маса, облеката е испрана, плочките изгланцани, сите се стокмени. Жената е машина во движење, таа е неуморна. Полна ентузијазам и енергија, додека телото ѝ се витка од умор, а очите ѝ плачат за сон.

Таа секогаш знае да се справи со настинки. Таа ќе ја крене целата болница во воздух за доброто на децата. Таа има време и нерви за проверка на домашната задача и бескрајно повторување на стихотворбата за утре.

И на сето нејзино залагање, целиот тој напор, луѓе се дрзнуваат и коментираат каква била во ПМС или во менопауза?

Сериозно луѓе, треба да ја бакнувате земјата по која одат вистинските жени.

Потенцирам вистинските, не оние налицкани суштества коишто не знаат на која планета живеат.

Онаа која е во костец со животот секој ден. Која се смее и кога е најтешко. Кога ве теши, дури и кога целиот свет околу вас се урива.

За таквата жена вреди да се бориш. Таа го заслужува твоето внимание, твојата почит, верност и љубов.

Жената која знае што сака. Која е неуморна. Која се грижи за сите.

Не си дозволуваш да коментираш за нејзините „жолти минути“.

Одиш и ѝ купуваш цвеќе, заблагодарувајќи му се секој ден на господ и судбината што ја имаш покрај себе.

©CRNOBELO.com Забрането преземање и копирање. Крадењето на авторски текстови е казниво со закон.

(О)Милена | Црнобело