Што е значајно во животот?

Ова е постара приказна за која сметавме дека вреди да ја споделиме со оние кои сè уште не ја слушнале, а останатите да се потсетат за вредностите во животот.

Професор на час по филозофија наредил неколку предмети пред него. Кога започнал часот, тој зел една голема празна тегла од мајонез и започнал да ја полни со топчиња за голф.

Потоа ги запрашал студентите дали теглата е полна. Тие потврдиле.

Професорот зел кутија со камчиња и ги истурил во теглата. Ја протресол лесно теглата. Камчињата го пополниле празниот простор помеѓу топчињата за голф.

Повторно ги запрашал студентите дали теглата е полна. Тие се согласиле дека е полна.

Професорот зел кутија со песок и ја истурил во теглата. Секако дека песокот ги дополнил сите празни дупчиња во теглата. Уште еднаш прашал дали теглата е полна, а студентите тивко одговориле „Да“.

Професорот зел две чаши со кафе од под масата и ги истурил во теглата, а песокот го впил кафето.

„А сега“, прашал професорот?

„Сакам да замислите дека оваа тегла го претставува вашиот живот. Топчињата за голф се важните нешта – вашето семејство, деца, здравјето пријателите и вашите омилени пасии – работите кои ве потсетуваат дека иако изгубите сè, вашиот живот се уште ќе биде исполнет. Камчињата се останатите работи кои се значајни – вашата работа, куќа, автомобил. Песокот ги претставува сите мали нешта.“

„Ако го ставите песокот прв во теглата, нема да има простор за камчињата, ниту пак за голф топчињата. Исто така е и во животот. Ако ја трошите енергијата на мали нешта, никогаш нема да имате простор за нештата кои ви се значајни. Посветете внимание на нештата кои се круцијални за вашата среќа. Играјте си со децата. Правете редовна контрола на здравјето. Отидете на вечера со партнерот. Лудо забавувајте се со пријателите. Секогаш ќе има време за да ја чистите куќата, или да ја носите колата на поправка.“

„Погрижете се прво за топчињата за голф, за нештата кои се навистина значајни. Поставете ги своите приоритети. Останатото е само песок“.

Еден од студентите ја кренал раката и запрашал: „А што е со кафето?“

Професорот се насмевнал. „Драго ми е што праша. Тоа е само тука за да ви покаже дека колку и да ви изгледа вашиот живот исполнет, секогаш постои простор за неколку шољи кафе со пријателите!“