„Чичко пушти летки“, крадење зелени кајсии и уште неколку спомени од детството

Ех, кога бевме деца...потребни се само неколку „времеплов“ разговори со пријателите за да се потсетиме на најубавите безгрижни моменти од детството. За жал, нема да се вратат никогаш, но ни остануваат прекрасни спомени за едно поинакво детство од она на денешните деца...

Кога одевме во WC викавме да дојдат да нѐ избришат: „Готовооо!“

Ѕвоневме на непознати броеви и дишевме во телефон.

Ѕвоневме на врати кај комшиите во маало и бегавме.

Се разочарувавме кога за роденден ќе ни подареа облека или тетратка наместо играчка.

Пиевме сок од вишна и се правевме дека пиеме вино.

Гледавме цртани докај 19 и 30, потоа знаевме дека е време за спиење.

Бегавме кога проаѓаше „Старо купувам“ на улица.

Купувавме мастики „цигари“ и се правевме дека пушиме. Ова го правевме и со грисини стапчиња.

Скришно ѕиркавме додека мижевме кога на телевизија ќе имаше некоја љубовна сцена.

Си игравме продавница, доктори, фризери, учителки... по цел ден, надвор.

Правевме чатали и игравме џамлии.

Крадевме зелени кајсии и сливи од дворовите. Крадење цреши беа најдобриот дел од летото.

Секогаш се каравме и бевме во „војна“ со децата од соседната улица или маало.

Цртавме со парчиња цигли по улици.

Игравме жмурки, камај, народна, брканица, џамија, цигари, претвори се...

Дома не одевме ни за јадење – родителите ни правеа сендвичи со путер, сирење и патлиџанче и ги јадевме на улица.

Сите бевме во банди.

Игравме расипан телефон и имавме тајни.

Кршевме семки од кајсии на улица.

Кога авиони пуштаа флаери викавме: „Чичко пушти летки“.

Се радувавме кога ќе ни дадеа пари за флипери.

©CRNOBELO.com Забрането преземање и копирање. Крадењето на авторски текстови е казниво со закон.

Е. П. | Црнобело