Усреќен бездомник од Скопје, поддржани фудбалери со тон емоции – ваква Македонија сакам!

Ете, ваква Македонија сакам! Македонија позитивна, сплотена, ведра, среќна Македонија!

Убаво ми е на душата кога ќе отворам Фејсбук и наместо тон негатива, политика и препукувања, ќе наидам на нешто убаво, на вест која ми ја грее душата.

Така случајно наидов на објавата на професорката Валентина Панџарова, која вирално се споделува.

Таа раскажува како ученици од гимназијата „Никола Карев“ од Скопје му го разубавеле денот на еден бездомник.

„Дедо Исмаил е 38 години бездомник. Одамна го гледаме на ќошот на Гимназија Никола Карев, седнат, полуслеп, истоштен, во придружба на кучето, па и тоа бездомник. Одвреме, навреме децата му оставаат сендвич, кој го дели рамно на пола. Пола за него,пола за другарчето.

Пред некој ден, учениците од Карев разговараа со него за животот, за здравјето, за потребите... Скромен, вели не му треба ништо освен чист џемпер и маица.

За кратко време му ги подарија. Деца се тоа, чисти, жалосливи, искрени...Прашаа што може друго да сторат за него. Дедо Исмаил одвај проговори дека би сакал некогаш да се избричи.

Лека, полека, колку му дозволуваат годините што му натежнале, во придружба на Каревци го однесовме до првата берберница, каде љубезниот персонал го дотера.

Горда сум на вас деца, знам колку е убаво чувството кога теоријата ја оставате во училница. Делата се битни“, напиша таа.

Верувам дека и вам ви е топло на срцето што имаме ваква младина.

Потоа отворам Фејсбук и гледам како знаеме од срце да навиваме, каква силна поддршка сме за македонската фудбалска репрезентација.

Ги бодриме со тон емоции, ги славиме токму онака како што заслужуваат, а многу Македонци отидоа и таму во Порто, Португалија за да ги поддржат.

Се пеат македонски песни, се вее нашето знаме.

Ете, ваква Македонија сакам! Македонија позитивна, сплотена, ведра, среќна Македонија!

Почувствувајте ја еуфоријата - „Португалците се сликаат со нас“ - македонските навивачи ја пренесуваат атмосферата од Порто за CRNOBELO.com (фото+видео)

С. С. | Црнобело