Со маж ми на секое патување запознаваме по еден прекрасен пар – ни стануваат пријатели за цел живот и нема поубаво

Со сопругот обожаваме патувања и го обожаваме животот... Функционираме лежернo во пристапот кон тоа како треба да ни изгледа еден ден - со главна цел да бидеме среќни и да ни е забавно секој ден (по можност).

Па, така омилени ни се патувањата и познанствата кои произлегуваат од нив.

Особено кога станува збор за организирани патувања, не се враќаме без низа нови познанства и најмалку еден пар нови, прекрасни пријатели.

Па, така до денес се дружиме со парот што го запознавме лани на одмор во Египет, а од годинава имаме уште еден пар прекрасни пријатели, од пролетното патување во Италија.

Со овие луѓе од старт нè поврзува страста за патувања, за авантури и секојпат кога ќе ги видиме нè асоцираат на нешто убаво.

Секојпат ни враќаат спомени на тоа патување на кое сме се запознале и често си евоцираме симпатични спомени.

По патувањата следуваат кафе средби, па дружби по дома на гости, дури и родендени и свадби, а најубаво од сè e планирањето на нови заеднички патувања.

Си споделуваме и радости и маки, но некако сè е неоптоварено, лесно, си доаѓа природно.

Фокусот на заедничката страст – истражувањето каде да се отпатува следо, па симпатичното гуглање на инфо за разни дестинации, па разменување искуства што сме дознале ни е омилена тема, нормално попатно запознавајќи се еден со друг како личности, од тоа до каде сме на поле кариера, спомени од детство, планови за иднина, претставување на членовите од најблиското семејство.

Уште од сега ми е симпатично во глава кога ќе помислам како би изгледале нашите средби пример за 50 години од сега.

„Ех, се сеќавате кога бевме млади и бевме таму и таму на патување...“

Бесценето, зарем не?

©CRNOBELO.com Забрането преземање и копирање. Крадењето на авторски текстови е казниво со закон.

С. С. | Црнобело / фото: depositphotos.com