Зошто секогаш постои тој еден турист кој се жали од условите на турата?

Не, не е во ред да уплатите за скромна туристичка тура, а да очекувате хотел со 5 ѕвездички, па потоа гласно да се жалите, да се карате со туристичкиот водич, да ги мрачите другите, а да ги поттикнете на негативни коментари уште неколкуте скриени негативци во туристичката тура со вас... Нели е така?

Во ред е да си ги цените парите, во ред е да барате права и да не дозволувате никој да ве злоупотребува...

Но, не е во ред да уплатите за скромна туристичка тура, а да очекувате хотел со 5 ѕвездички.

Прво и основно, при патување, особено во аранжман од агенција и со многу сопатници, е да си ги прилагодите очекувањата на понудата, а не за „50 евра за 7 дена“ да очекувате претседателски апартман, масажа со топли камења и ладење со балдахин.

Бидете реални и не ги мрачете сопатниците со непотребни замерки и коментари.

Пред извесно време бев на една тура, каде за првпат во животот немаше „правдобарачи“. Сите беа задоволни од добиеното, па дури и да имаа некои ситни замерки не ги кажуваа на глас затоа што приоритет им беше добриот помин и убавата енергија, а не зошто пешкирот бил во розова, а не во бела боја.

А таквите правдобарачи? Ги има тон во поголемиот дел од турите.

Не само што се жалат, туку повлекуваат нога за и многу други да го сторат истото, неретко и без причина, па завладејува една токсична атмосфера, еден негативизам, една непотребна борба за права, која завршува со фрустрации и бес, наместо со убаво патување и прекрасни спомени.

Почнува првиот да се жали, па се охрабрува вториот, па ете го се јавил третиот и тоа е тој ефект на стадо. Дури и да немаат што да кажат ќе смислат нешто.

А за замерки? Па, нема многу потреба за креативност! Ако се концентирате на лошото, тогаш на сè и секого ќе пронајдете мана, никој и ништо не е совршено и тоа што барате да го видите, тоа и ќе го видите.

Веќе добро е позната филозофијата со тоа дека песимистите ја гледаат чашата половина празна, а оптимистите половина полна.

Утре, нема да ја паметите бојата на пешкирот од патувањето или подот што крцкал, ќе ги паметите луѓето кои сте ги запознале, местата кои сте ги виделе и емоциите кои сте ги доживеале. Зошто да си го расипувате одморот и себеси и на другите?

Фокусирајте се на уживањето, а не на барањето влакно во јајцето.

Стоп, за праводбарачите! Се разбира, кога барањата се неосновани и претерани.

Кога веќе одите на патување во куферот спакувајте си само позитивна енергија и насмевка и уживајте. Вие ќе си поминете убаво, а нема да им го расипете одморот ниту на тие околу вас.

©CRNOBELO.com Забрането преземање и копирање. Крадењето на авторски текстови е казниво со закон.

С. С. | Црнобело