Зошто сакам да се дружам со луѓе кои се поуспешни од мене?

Затоа што сакам да растам.

Затоа што сакам да научам нешто од нив.

Затоа што сакам да си поставам предизвик да ги стигнам, па можеби и надминам еден ден.

Затоа што сакам да ги изанализирам добро за да сфатам што имаат тие, а немам јас, дали е само поинаква стартна позиција во животот или пак интелектуален капацитет и амбициозност.

Затоа што сакам да видам што поинаку прават во секојдневието и кои се нивните начини на кои растат како личности.

Затоа што сакам да слушнам нешто поинакво, а не зборови и животи затворени во четири ѕида.

Затоа што сакам да го видам светот низ нивните очи.

Затоа што сакам да ми бидат инспирација.

Затоа што не ми будат завист, туку восхит.

Затоа што сакам да учам од нивните зборови.

Затоа што сакам да ме заразат со нивната енергија дека ништо не е невозможно.

Затоа што не сакам ментално да бидам на истата позиција како вчера.

Затоа што сакам да учам од нивните манири можеби, нивниот став кон животот можеби или од таа една карактеристика што кај нив како луѓе за мене е инспиративна.

Затоа што ми се допаѓа да сум со луѓе кои ме тераат да си ги ширам хоризонтите, да читам, да сакам да патувам, да сакам да пишувам поезија можеби, сеедно.

Затоа што не ме тераат да слушам озборувања и осуда за туѓи животи.

Затоа што не прават да се прашувам колку сум ги надраснала и колку веќе немам ништо заедничко со нив.

Затоа што не можам повеќе да разговарам со луѓе што не сонуваат и што животот го сфаќаат како една сива и тешка рутина од која нема спас.

Затоа што јас го сфаќам сосема поинаку...

©CRNOBELO.com Забрането преземање и копирање. Крадењето на авторски текстови е казниво со закон.

Симона Симионова | Црнобело