Страв им е да одат во тоалет, работат 60 часа неделно: Страшните услови за работа во магацините на Amazon

Џеф Безос одамна е критикуван за нехуманите услови за работа во складовите на Amazon. Работниците уринираат во шишиња бидејќи ако го напуштат работното место и на 5 минути, може да бидат отпуштени. Истовремено, за празници мораат да работат и до 60 часа неделно и немаат право на платен одмор.

Amazon важи за најголемиот онлајн трговец на мало во светот и се вбројува меѓу најскапите компании во светот.

Сепак, Џеф Безос стана еден од најбогатите луѓе во светот благодарение на Amazon.

Компанијата на милијардерот има над 1,5 милиони вработени, од кои повеќето работат во магацините каде што се пакуваат и испорачуваат нарачките.

Иако за многумина Џеф Безос е инспиративна личност која сама се снашла во животот, постојат многу контроверзии за условите на работа што им ги наметнува на вработените во Amazon, особено оние во магацините.

Американците редовно го критикуваат милијардерот за нехуманите услови на работниците во складовите и сметаат дека ги експлоатира бидејќи им дава многу ниска плата.

Дел од скандалите и инцидентите поврзани со условите за работа во складовите на Amazon:

Продуктивноста на работниците се следи со софтвер

Безос сака неговите работници да бидат што е можно попродуктивни, па за таа цел ги следи со софтвер.

Со овој софтвер се следи колку нарачки скенирале работниците – според некои гласини, се очекува да скенираат нова нарачка на секои 11 секунди.

Ако задоцнат и само една секунда, софтверот го забележува ова и по неколку вакви доцнења, работникот може да добие отказ.

Не е познато колку точно работници добиваат отказ поради софтверот, но во јавност се дозна дека во еден магацин, софтверот бил одговорен за бркање дури 300 работници во една година.

Работниците не смеат да одат во тоалет

Истиот софтвер што го спомнавме забележува и колку време работниците поминале во тоалет. Ако одат многу често, повторно им се заканува отказ.

Некои поранешни работници имаат откриено дека плашејќи се дека ќе останат без работа, уринирале во пластични шишиња, за да не им биде заведено отсуство.

Многу работници се повредуваат во магацините

Некои анализи покажале дека безбедноста на работниците во складовите на Amazon е загрозена, најмногу поради огромните барања од нив.

Бидејќи треба да спакуваат нереален број нарачки, неретко работниците ги игнорираат мерките за безбедност бидејќи ако не ја исполнат квотата, може да бидат избркани.

Во еден од складовите имало дури 422 повреди, што било четирипати повеќе од нормата во САД во оваа индустрија.

Работниците се соочуваат и со проблеми како болки во грбот и зглобовите поради тешката работа.

Продолжува на следната страница...