Како да ја сочувате бижутеријата?

За вашата омилена бижутерија да не ви позелени по извесно време, прочитајте неколку мали совети и сочувајте ја да свети со полн сјај.

Не ја мокрете – Бижутеријата никако не ја потопувајте. Секој пат кога се туширате, одите на базен или слично, симнете го накитот од вас.

Накитот ставајте го последен – Почекајте да се подготвите до крај, па тогаш ставете ја бижутеријата на вас. Парфемите, лосионите за тело и останатите козметички препарати може само да ја оштетат бижутеријата и да и го одземат сјајот.

Во никој случај не ставајте лосион за тело – Ако планирате да носите бижутерија, избегнувајте кожата да ја мачкате со лосион за тело. Тој ќе остави флеки на накитот, кој подоцна може да ви испушти некоја боја на вашата кожа.

Чувајте ја на вистинско место – Дали знаевте дека и воздухот ја оштетува бижутеријата? За да го заштитите својот омилен накит, секогаш чувајте го во кутија за накит. Исто така, никако не го мешајте со други метали и материјали.

Понекогаш исчистете ја – Сосема е во ред понекогаш да ја исчистите бижутеријата. Можете да користите бебешки сапун, топла вода и четка за заби.

Извадете го додека ја чистите домот – Производите за чистење потполно може да го оштетат накитот, па затоа пред чистење на подовите или прозорците задолжително извадете ја бижутеријата од вас. Кај некои луѓе дури и може да се појави несакана реакција на кожата во вид на алергија заради комбинацијата на метал и средства за чистење.

Не вежбајте со накит – Пред да се упатите во теретана, извадете го накитот од себе. Прво, ќе ви пречи во самото вежбање, а исто така и може да ви создаде алергиски реакции во комбинација со потта.