Каде живеат најмногу милионери?

Иако повеќето на прашањето каде во светот живеат најмногу милионери, би одговориле Њујорк, Лондон или Монако, состојбата е многу поинаква. Најновото истражување на лондонската независна компанија Велт Инсајд покажало дека престолнината на денешните богаташи, сепак е Токио.

Новата студија на оваа лондонска независна истражувачка компанија покажала дека Токио го презема приматот на листата градови со најмногу жители чиј имот поминува милион долари. Во таа пресметка не се вбројува вредноста на куќите во кои што живеат богаташите.

По нивните податоци во Токио живеат дури 461.000 милионери. Потоа следи Њујорк со 389.000, потоа Лондон со 281.000, Париз со 219.000 и Франкфурт со 217.000 имотни граѓани.

„Најголемата причина поради која Токио е на тронот на листата е густата населеност“, изјавил Андреј Амоилс, одговорниот за студијата.

Додека богаташите во Америка се раштркани по бројните градови, во Јапонија популацијата на милионери е концентрирана во главниот град.

Во прилог на ова зборува и податокот дека една петтина од јапонските милионери живеат во Токио, додека во Њујорк живеат само пет проценти од сите американски милионери.