Зошто женските кошули имаат копчиња на левата, а машките на десната страна?

Постојат неколку теории за тоа зошто се разликуваат страните на кои се зашиени копчињата на женските и машките кошули. Ниедна не е со сигурност оправдана и прифатена, сите имаат свои недостатоци, но сепак потекнуваат од ист период, првата половина на 19. век.

Една од теориите укажува на тоа што во минатото богатите жени имале посебни слугинки кои ги облекуваат, па сакајќи да им ја олеснат работата и да можат полесно да ја користат десната рака при закопчувањето, копчињата биле сместени на левата страна.

Сепак, тоа не е доволно уверливо бидејќи и богатите мажи имале слуги кои ги облекуваат и нивните кошули и униформи биле со повеќе копчиња, па сепак тие останале на десната страна.

Исто така, многу од жените немале слугинки, но сепак го следеле трендот кој го поставувале богатите жени.

Втората теорија е дека на тој начин жените кои немале слугинки да ги облекуваат биле приморани сами да се закопчуваат, а со тоа да мора да ја користат повеќе левата страна, која не им е толку функционална и да покажат потчинетост и подреденост пред мажите, како понеспособни.

Но, и тука има нелогичности, бидејќи многу од жените сами си ги шиеле кошулите, па нема зошто сами да се ставаат во подредена позиција.

Третата и најверојатна теорија се надоврзува на првата, но не се однесува на тоа за да им ја олеснат работата на слугинките, туку за со тоа да покажат дека се доволно богати за да имаат некој кој ќе ги облекува и закопчува.

Иако ваквите теории постојат одамна, подоцна веќе без разлика на објаснувањето и приказната зад нив, прифатен е трендот и принципот на такво шиење и на машините за производство на кошули.