Докажано: Мрачниот хумор е одлика на интелигентните луѓе

Податоците од последното истражување спроведено од страна на списанието „Cognitive Processing“ укажуваат дека има силна поврзаност помеѓу интелигенцијата и црниот хумор.

Предводено од Медицинскиот универзитет во Виена, во истражувањето учествувале 156 испитаници (мажи и жени), со просечна возраст од 33 години и со различен степен на образование.

На испитуваните прво им било дадено да решаваат општ тест за интелигенција кој вклучувал вербални и невербални прашања, а подоцна ги натерале да погледнат 12 илустрации на германскиот уметник Ули Штајн, сите со мала доза на црн хумор во себе.

Несомнено, секој од испитаниците реагирал различно од другиот. Но, оние кои нескриено се насмеале и воедно истакнале дека понекогаш им е срам поради таквото однесување и ги доведуваат своите морални вредности под знак прашалник, сепак немаат потреба од паника.

Долг временски период црниот хумор како карактеристика се поврзувал со меланхолично расположение, а ретко со луѓе кои покажуваат повисоки когнитивни способности.

Спроведената студија ги покажала следните резултати:

Оние кои ги сфатиле и се изнасмеале на мрачните комични цртежи не само што имале највисок резултат на општиот тест за интелигенција, туку покажале и најниски резултати во тестовите кои мереле агресија, негативно расположение и воедно се истакнувале со повисоко образование од другите.

Оние на кои не им се допаднале шегите покажале просечни резултати на тестот за интелигенција и покажале највисоко ниво на агресија и негативно расположение.

Испитаниците пак кои не ги сфатиле најдобро шегите од цртежите исто така имале просечен резултат на тестот за интелигенција, но и нивото на агресија им било проценето како просечно, а демонстрирале генерално позитивен став кон животот.

Па, сите вие кои имате блиски другарчиња со морбидна смисла за хумор или и самите уживате во црн хумор, немате потреба за грижа и паника.

Не сте злобни, туку доволно интелигентни и паметни.

(О)Милена | Црнобело