Приказната што се крие зад познатата слика „Бакнежот“ на Густав Климт

Австрискиот сликар Густав Климт е еден од најпознатите сликари во светот. Многу негови слики се сметаат за ремек-дела, но една се издвојува од сите други, а тоа е познатата слика „Бакнежот“.

Климт е претставник на симболизмот кој се карактеризира со мистични мотиви, многу бои и силно изразена естетика. Ова уметничко дело ги маѓепса љубителите на сликарството уште во 1908-ма, годината кога е создадено.

Во тој период, Климт воопшто не мислел дека ова дело ќе му донесе голема слава. Галеријата Белведере ја купила сликата уште пред да биде целосно завршена.

„Бакнежот“ прикажува двајца љубовници во прегратка на поле со цветови. Мажот е наведнат и ја бакнува девојката. Женската фигура носи шарен фустан и венец од цветови на главата. Затворените очи симболизираат спокој и интимност.

„Бакнежот“ е уникатно дело не само поради начинот на кој е прикажан еден обичен љубовен бакнеж, туку и поради шемата на контрасти, светлите бои и прецизните линии.

Иако никој досега не успеал да ја открие вистинската приказна зад сликата, постои теорија дека ова е портрет на уметникот и неговата партнерка, модната дизајнерка Емили Флоге, која ја има насликано во други дела.

Некои пак, велат дека жената на сликата е „Црвенокосата Хилда“, поради црвената коса на девојката. Хилда често позирала на сликите на Климт.

Се смета дека златната боја која доминира во делото е отсликување на физичките задоволства, што е храбро од страна на Климт, бидејќи во тој период црквата забранувала вакви теми јавно.

Ваков приказ на љубовта се среќава и во други дела на Климт, но не на толку драматичен начин. Ова е инспиративна и магична слика која е далеку пред своето време и на која јасно се гледа генијалното мајсторство на сликарот.

Сликата денес е изложена во Австриската галерија Белведере.

М. В. | Црнобело