Јапонците одат во шума, Германците пијат пиво: Техники за среќа од целиот свет

Кога ќе погледнеме наназад во нашите животи често тоа што е најзначајно се настани како роденденска забава, бакнеж, нова работа или спортско постигнување.

Но, начинот како го живееме нашиот секојдневен живот навистина дефинира кои сме ние и како се чувствуваме.

Луѓето ширум светот пронашле свои техники како да го подобрат расположението и ги практикуваат стотици години.

Секој регион има свои идеи за разубавување на животот. Од Јапонија до Норвешка, пронајдете инспирација од нив.

Јапонија

Јапонците имаат релативно нова „традиција“ на спојување со нивните души. Таа се нарекува „shinrin-yoku“ односно капење во убавините на шумата. Развиена е во 1980-тите во атмосфера на задушувачки градови и сеприсутна технологија.

Отидете во шума, размислувајте за секој звук што ќе го слушнете, ценете ги мирисите и текстурата на дрвјата и комплетно ќе се релаксирате.

Хаваи

Начинот на кој жителите на Хаваи се справуваат со секојдневните проблеми се вика „Ho‘oponopono“. Без разлика кој ве повредил ова е техника со која треба да ги сфатите работите сами наместо да одговорите брзо и да ја влошите ситуацијата.

Земете длабок здив, десет минути размислете низ што минувате, бидете благодарни за тоа што го имате, обидете се да погледнете од страната на другиот, работете на простувањето и мирно изразете ги своите чувства.

Норвешка

„Friluftsliv“ е практика за релаксација во Норвешка. Тоа значи минување на што повеќе време надвор на свеж воздух и дневна светлина, која ќе помогне во останување во контакт со природниот ритам на светот околу вас.

Направете си навика на задолжителна утринска или вечерна прошетка во природа, излезете од канцеларијата на паузата од работа, пронајдете национален парк во вашата држава и посетете го.

Германија

Германците се концентрирани на обновување на врски еден со друг. „Gemütlichkeit“ е славење на заедништвото со пиво, песна и танц.

Искористете ги благодатите од богатиот социјален живот и не пропуштајте пригода да им нагласите на луѓето колку ви значат.

Шпанија

Познатата шпанска „siesta“ што значи куса пладневна дремка во раните попладневни часови по оброкот е загрозен вид. Дури и експертите се почесто советуваат дека дремката попладне ја подобрува продуктивноста, сепак многу менаџери се загрижени за загубата на време и енергија на работното место.

Здрава „siesta“ значи дремка не подолга од 30 минути, спиење на фотелја или кауч, наместо на спална и редовно практикување на истата.

Франција

Ние сме генерација заглавена во мултитаскинг. Правењето на повеќе работи едновремено прави работата и приватниот живот да се преклопат и со тоа им правите лошо на двете и не уживате. Французите нашле лек за ова. Тоа е мал дневен ритуал на одделување на овие области од животот со мал пијалак помеѓу работата и оброкот дома наречен „apéritif“.

Штом пристигнете од работа дома облечете чисти алишта, исклучете го службениот мејл и сипете си чаша добар пијалак.

Босна и Херцеговина

Босанците сакаат да го започнат утрото со бавно кафе, приготвено во специјално ѓезве и сервирано со шеќер или колаче. Вкусно е како турското кафе, но најважна е симболичната страна – времето одвоено за дискутирање за дневните настани.

Започнете и вие да го цените кафе како искуство само по себе, а не нешто што го правите додека работите. Паузата за кафе користете ја за разговор со луѓето околу вас, наместо за зјапање во телефонот.

И Македонците се љубители на шолја добро кафе, но и на чашка домашна ракија. Што мислите вие, која е нашата техника за среќа?

С. С. | Црнобело