Момент на вистината: Како да не паднете на детектор за лаги?

Нервозни сте, ве облева студена пот, па дури и рацете ви се тресат? Не лажете, но страв ви е дека ќе паднете на испитувањето на детекторот за лаги?

Сигурно мислите дека никогаш во животот вие нема да се најдете на детектор за лаги, но тоа сепак може да се случи, дури и да не станува збор за сериозно полициско испитување, туку за некоја забавна емисија од типот на квизот „Момент на вистината“, кој беше актуелен во регионот пред неколку години.

Како низ ова искуство да минете достоинствено и успешно:

На кој принцип функционира полиграфот?

Оваа машина ги снима физичките промени што настануваат во вашето тело при одговарање на поставените прашање. Полиграфот ви ги мери пулсот, потењето, ритамот на дишење и притисокот.

Модерните детектори за лаги може да следат и до 50 различни реакции, како што е на пример ширењето на капиларите, кое е инстантна реакција при шокантно прашање.

Експертите тврдат дека интерпретацијата на резултатите е повеќе уметност отколку наука, затоа што во голема мерка зависи од искуството и вештините на испитувачот.

Како да се подготвите за тестирање на полиграф?

Бидете физички подготвени

Мора добро да се наспиете, да бидете умерено најадени и да носите комфорна облека. Држењето до нормалната рутина не ви предизвикува промени во телото и во срцебиењето.

Пиење кафе или трчање? Сè што правите во нормален ден, направете го и на денот на тестирањето.

Дозволете си да бидете нервозни

Нервозата е нормална, па дури и ќе ви помогне подобро да минете на тестот. Резултатите на тие што се нервозни на секој одговор, според статистиките, излегуваат најточни.

Но, ако сепак мислите дека вашата нервоза ќе влијае негативно, подгответе се.

Испитувачот ќе ви постави некои обични, контролни прашања и некои важни. Контролните прашања лесно ќе ги забележите затоа што тие се општи и не се однесуваат на конкретната ситуација за која ве испитуваат.

Па, така ако сте смирени при одговарање на контролните, треба да останете смирени и при одговарање на важните.

Обидете се да не лажете за деталите

Колку подетално ја кажувате вистината, толку подобри резултати ќе имате.

Дури и малите банални лаги на детекторот за лаги може да ви направат проблем.

Не брзајте

Ислушајте го прашањето до крај, размислете дали добро го разбравте и потоа смирено одговорете.

Размислувајте на нешто пријатно

Овој метод се смета за успешен, но само кај луѓето кои знаат како да се контролираат себеси.

Ако ви постават прашање и вие сфаќате дека мора да кажете лага, замислете нешто колку што може попријатно за вас.

Направете си безгрижен свет и задржете ја смиреноста. Со пријатни соништа со отворени очи, реакциите на вашето тело ќе бидат идеални.

Не правете физички трикови

Триковите за предизвикување на негативни реакции на телото од типот на ставање копче во чизмите и згазнување на него во вистинскиот миг или пак гризење на јазикот се забележителни и испитувачите добро ги знаат.

Плус, и полиграфот ја препознава вашата реакција на физичка болка.

Кога не можете да бидете тестирани на полиграф?

Во некои ситуации резултатите од детекторот за лаги може да бидат погрешни, па така луѓето не треба да бидат тестирани во случај на ментална болест, срцеви заболувања, бременост, болести на респираторниот систем (дури и обична настинка), епилепсија итн.

С. С. | Црнобело