Не им е страв само на децата - Зошто некои возрасни се плашат од темница?

Лежите во кревет, спремни да заспиете, кога одеднаш слушате звуци од ходникот. 

Ги отворате очите во страв, а во најдалечниот агол на собата нешто се движи, или барем така ви се чини. Ги затворате очите и повторно ги отворате за да проверите дали „тоа“ исчезнало. Кога конечно ќе се раздени, не можете да верувате дека нешто ве исплашило претходната ноќ. Додека повторно не дојде самрак.

И возрасните повеќе ја сакаат светлината

За некои, ова е само сеќавање од детството, но некои луѓе страдаат од страв од темница и во зрелоста. 40% од возрасните луѓе се плашат да станат ноќе, а 10% не одат ниту во тоалет додека не се раздени.

Ако имате над десет години, а темницата сè уште ве заплашува, не сте нерационални. Стравот од темнината и она што може да се крие во неа е еден од најраните човечки стравови.

Луѓето се генетски програмирани да ја поврзат темнината со опасност, затоа што нашите далечни предци биле жртви на предатори најмногу по самрак.

Наместо ноќен вид - страв

Иако луѓето еволуирале од инстинктивни до паметни суштества, не развиле многу добар ноќен вид. Темнината ја намалува нашата способност да се снаоѓаме во околината и без најважното сетило ја губиме контролата и стануваме ранливи.

За да се справиме со овој недостаток, измисливме факели, свеќи, ламби и електрично осветлување, но кога ќе се изгаснат светлата, повторно сме соочени со старата ранливост.

Свесни за својата ранливост, луѓето го развиле стравот како природен механизам за заштита од опасноста што демне во мракот. 

Страв од ноќните животни што претставуваат смртоносна закана влегол во генетскиот код на современиот човек. Оној кој имал генетска варијација што донела поголем страв од темнината, бил повнимателен. Бил повеќе буден во текот на ноќта, живеел подолго и поуспешно се репродуцирал, пренесувајќи го заштитниот ген на идните генерации.

Овој ген преживеал во генетскиот код, па дури и денес, луѓето чувствуваат страв од темница, од ноќта, иако живеат во многу побезбедна околина.

Ашера | Црнобело