Како да го спречите замаглувањето на очилата додека носите заштитна маска?

Носењето маска стана задолжително, но со ова се појави проблем за кој оние со добар вид не се свесни – носењето маска ги замаглува очилата.

Причината за ова е тоа што маската го пренасочува топлиот воздух што го издишувате кон очилата, а од ова се формираат ситни капки вода на нивните стакла.

Воопшто не е лесно да гледате низ замаглени очила, особено кога треба да одбирате намирници во продавница.

За среќа, постојат некои трикови кои ќе ви помогнат, ако ништо друго, барем малку да го намалите замаглувањето на очилата:

Сапуница

Овој трик го споделија двајца лекари од Англија, уште во 2011-та година.

Треба да ги измиете очилата со сапуница, да го „истресете“ вишокот вода и да ги оставите да се исушат или нежно да ги избришете.

Наводно, сапуницата остава тенок слој откако ќе се исуши, а овој слој ја спречува кондензацијата на очилата.

Сепак, некои експерти сметаат дека кај некои понови модели на очила, овој трик може да не функционира.

Спреј против замаглување

Денес постојат продукти чија намена е спречување на замаглувањето на стаклата.

Во овој случај, најдобро е да се консултирате со вашиот очен лекар, кој може да ви понуди и некое друго решение.

Прилагодување на маската

Можете да направите и еден вид преграда помеѓу очилата и маската, така што влагата од носот и устата нема да стигне до стаклата.

Доколку имате „мека“ маска, прицврстете го горниот дел со леплива лента. Доколку имате „цврста“ маска, направете го истото, само ставете и хартиено шамивче кај носот за да ги пополните празнините.

Осигурете се дека лентата е добро прицврстена, за да не мора да го допирате лицето кога ќе излезете надвор.

Пена за бричење

На многу форуми можете да го најдете овој совет против замаглување на очилата. Наводно, пената има иста функција како и сапуницата – остава тенок слој на стаклата што ја спречува кондензацијата.

Сè што треба да направите е да ги избришете очилата со пена за бричење.

Обидете се со некој од овие трикови, можеби ќе успее и ќе ви го олесни процесот на носење очила и маска истовремено. 

Спирова С. | Црнобело