Совети и трикови за справување со луѓето кои ве потценуваат и навредуваат

Дури и да сте најдобрата и најкултурната личност на светот, секогаш ќе има некој што ќе ве потценува и ќе се обиде да ве навреди со некој коментар. Како да изреагирате во вакви ситуации?

Во овие моменти нормално е да почувствувате гнев и да посакате да ѝ „вратите“ на личноста, но со ова само ќе го направите конфликтот поголем и сигурно нема да се чувствувате подобро.

Наместо тоа, многу подобро е да искористите некој трик со кој суптилно ќе ѝ покажете на личноста дека не ви е грижа за нејзиното мислење, а истовремено нема да се чувствувате лошо поради недоличниот коментар.

Погледнете неколку совети и трикови што ќе ви се најдат во ваквите ситуации:

Немојте веднаш да реагирате бурно

Кога некој ќе ве навреди, веројатно првиот инстинкт ви е да се одбраните, но ова само ќе ве направи гневни, може да ве натера да кажете нешто за коешто ќе зажалите, а и ќе му покаже на соговорникот дека си ја постигнал целта.

Наместо тоа, помислете дека навредата или лошата замерка е најверојатно поради љубомора и не дозволувајте да ви го расипе расположението.

Не се вклучувајте во разговорот

Некогаш луѓето несвесно навредуваат бидејќи не ни помислуваат какво влијание ќе имаат нивните зборови. Во овие ситуации обидете се да сфатите дека тоа е само мислење на соговорникот, нема врска со вас и нема потреба да дискутирате на таа тема.

Направете кратка пауза

Ако забележите дека станувате многу гневни поради нечиј лош коментар, подобро напуштете ја просторијата за да се смирите пред да кажете што било.

Во повеќето случаи, доволно ќе ви бидат 5-10 минути за да се справите со гневот и да го избегнете конфликтот.

Прифатете го или одбијте го лошиот коментар на шеговит и пријателски начин

Наместо да се лутите за нечиј лош коментар, можете да го одбиете или да го прифатите на пријателски начин и да го избегнете конфликтот.

Ако го прифаќате, само кажете му на соговорникот дека е во право и насмевнете се. Ако не го прифаќате, со насмевка кажете дека не се согласувате, но и дека не ви е грижа за неговото мислење.

Побарајте објаснување

Ако некој ве критикува за изгледот или што било друго, прашајте го зошто го прави тоа. Ако, на пример, некој ви рече дека не му се допаѓа вашата фризура, прашајте го зошто го мисли тоа.

Во повеќето случаи соговорникот нема да го очекува прашањето и нема да знае што да ви одговори, а ова ќе ви биде можност да ја смените насоката на разговорот.

Игнорирајте ја личноста што ве навредува

Во некои ситуации, најдоброто нешто што можете да го направите за себе е целосно да ја игнорирате личноста што ве навредува.

Можете да ја игнорирате само навредата и да ја промените темата на разговор, или целосно да ја игнорирате личноста и да ја напуштите просторијата.

Не заборавајте дека не сте должни да одговарате на сите коментари.

Дистанцирајте се

Некогаш луѓето намерно бараат конфликт, а вие не можете да направите ништо во врска со тоа.

Ако забележите дека некој намерно ве провоцира за да почне караница, едноставно игнорирајте ги провокациите и дистанцирајте се.

Спирова С. | Црнобело