Идните европски кралици – трите принцези од Европа кои се подготвуваат да го наследат тронот

Во минатото обично машките деца ги наследувале троновите, без разлика дали имаат постара сестра. Но, времињата се менуваат и денес е сосема нормално жена да го наследи кралскиот престол.

Дефинитивно најпознатата кралица во светот е Елизабета Втора, која истовремено е и монархот кој најдолго владеел со Британија.

Во Европа постојат уште неколку кралски семејства, a три принцези веќе се подготвуваат да го наследат тронот со оглед на тоа што се први наследници, секако кога ќе дојде редот за тоа.

Погледнете кои девојки ќе бидат идните европски кралици:

Принцезата Леонор од Шпанија

Леонор е ќерка на кралот Фелипе и кралицата Летиција од Шпанија, има 15 години и е прв наследник на тронот.

Изминативе неколку години Леонор и нејзината сестра принцезата Софија привлекуваат сè повеќе внимание во јавноста, а младата наследничка почнува да се подготвува за нејзината голема улога кога ќе дојде време за тоа.

Леонор е родена во 2005-та година и е најстара ќерка на кралот Фелипе, кој го наследи тронот во 2014-та.

Младата принцеза веќе зборува пет јазици и, според нејзиниот татко, таа е неговата „десна рака“ и си ги извршува кралските должности со огромна посветеност. Леонор го одржа својот прв јавен говор во 2018-та, кога имаше само 13 години, а следната година одржа говор на четири различни јазици.

Изминативе година-две таа сè почесто ги придружува нејзините родители на важни настани, вклучувајќи го и настанот организиран во чест на жртвите од пандемијата.

Принцезата Елизабет од Белгија

Елизабет има 19 години, а нејзините родители се кралот Филип и кралицата Матилда од Белгија.

Кога ќе стане кралица, таа ќе биде првата жена која го наследила тронот на Белгија, а нејзините родители го даваат најдоброто од себе за да ја подготват за ова.

Минатата есен принцезата се запиша на Кралската воена академија во Брисел, со што дополнително ќе се подготви за улогата на кралица.

Досега најважниот настан во животот на Елизабет беше прославата за нејзиниот 18-ти роденден во 2019-та. Овој роденден е од големо значење за неа бидејќи полнолетството значи дека таа може да биде кралица без регент – личност која е водич на државата додека монархот е малолетен.

Принцезата Амалија од Холандија

17-годишната Амалија е ќерка на кралот Вилем-Александар и кралицата Максима.

Таа стана наследник во 2013-та, кога кралицата Беатрикс се откажа од тронот и нејзиното место го зазеде Вилем-Александар.

Амалија ќе се држи понастрана од окото на јавноста дури да наполни 18 години, а нејзините родители имаат изјавено дека до тогаш ќе ја заштитуваат нејзината приватност што е можно подобро. Ова значи дека таа нема кралски обврски и не е вклучена во големите кралски настани.

Спирова С. | Црнобело