Што кога би нашле 500 евра?

Имате ново момче, или девојка и полека се запознавате. Што сакаат, што не, за што размислуваат? Пожелно е да размислуваат за вас, но не очекувате...

...тоа да го прават по цел ден и ноќ – или можеби очекувате?

Во фазата на запознавање и вие и вашето момче/девојка ќе поставувате многу прашања за што подобро да се запознаете.

Едно од интересните, а не многу наметливи прашања е и:

„Ако пронајдеш 500 евра, на што би ги потрошил(а)?“

Секако, одговорот кој најмногу би ви се допаднал е дека парите би ги потрошиле на вас, било да е тоа заедничка забава, било нешто да ви купат. Варијантата со заедничка забава е поубава, затоа што значи дека размислуваат на вас како пар, варијантата со купување нешто за вас е чисто фолирање, обид да ви кажат нешто што посакувате да го слушнете (секако и заедничката забава може да биде фолирање, но барем звучи уверливо).

Добар е и одговорот дека тие пари би ги ставиле на страна во вид на заштеда, неважно е дали ќе ги стават во банка или дома. Таквиот одговор ви зборува дека сте со доверлива личност која размислува за иднината и на таа личност можете да се ослоните. Дури и ако се случи врската да не ви успее, таа личност најверојатно ќе може да ви биде добар пријател, некој во кого ќе можете да имате доверба.

Ако парите би ги потрошиле само на себе, јасно ви е дека сте со себична личност на која главно и е да си пружи сопствено задоволство – а за другите што и ако остане. Исклучок е ако си купат нешто кое подолго време го посакуваат, а финансиските можности не им дозволувале да си го купат, како на пример хит игра, или ЦД со омилена група.... Секако не е себично ако парите ги потрошат на нешто што им  е навистина неопходно.

Убав одговор е и ако семејството има финансиски проблеми, да им ги даде парите на родителите, тоа значи дека сте со внимателна личност која обрнува внимание на туѓите потреби. Убаво е и ако со најдените пари им купи нешто на братот или сестрата – супер е ако сте со некого кој се грижи за семејството, затоа што таквата личност умее да се врзе и сака блискост и не е некој што утре ќе ви побегне.

Ако најдените пари ги потрошите со своите пријатели, па...можеби не се работи за лоша личност- но вие баш и не му/и значите многу. Не им е лошо со вас, но ако се завртите и си одите, нема многу да му/и недостасувате – па најпаметно би ви било тоа и да го направите.