Како да го прочитате говорот на телото на вашето домашно милениче?

Веќе на сите ни е јасно што значи мавтањето со опашката кај кучињата или трепкањето со очите кај мачките. Но, како подлабоко да навлезете во проучување на говорот на нивните тела?

Секако, во домашни миленичиња спаѓаат и зајаците, морските прасиња, хрчаците, папагалите, аквариумски рипки и многу други животинчиња чиј говор на тело не е толку лесен за толкување.

Сепак, како одговорен сопственик треба барем да се обидете.

Прочитајте внимателно што можеби вашиот миленик ви порачува:

Морски прасиња и зајачиња

Овие животни не сакаат да се галат. Кога ќе ги земете во раце, тие се вкочануваат од страв и паника.

Тие во природата се најчесто плен на поголемите грабливци, па немојте да ги земате од зад грб, бидејќи помислуваат дека се уловени. Најдобро е да ги набљудувате директно во лицето.

Очајното цивкање и кај морските прасиња и кај зајаците е знак дека се исплашени и дека треба да се повлечете.

Хрчаци

Хрчаците никогаш не треба да им ги давате на деца за да си играат. Тие сакаат да спијат и никој да не им пречи, особено преку ден.

Ако некој насилно ги извади од кафезот, може да го гризнат. Но, прифатете го и тоа дека хрчаците се најдинамични ноќе, кога сопствениците се обидуваат да спијат.

Кучиња и мачки

Кучињата мавтаат со опашките и кога се среќни, но и кога се лути или агресивни. Разликата ќе ја забележите во тоа што лутото куче е во грч, спуштени му се ушите и 'ржи.

Кај мачките пак, ова е јасен знак дека треба да ги оставите на мир, бидејќи не им се допаѓа тоа што го правите. Ако им се спуштени и ушите, а зениците целосно собрани, тогаш вашата мачка е лута и иритирана, па не треба да ја задевате.

Е. Д. | Црнобело