Прекршете ги правилата

Постојат универзално прифатени непишани правила кои секој пар се обидува да ги почитува. Не треба да се грижите ако тоа не ви поаѓа од рака...

 

...Некои правила се застарени и бесмислени. Слободно заборавете ги следните пет.

Правило 1: Не смеете да загледувате други

Прекршете го: Ако сте во врска не значи дека сте слепи. Слободно може да го задржите погледот на симпатичниот дечко/девојка со кој се разминувате, без тоа да значи дека вашиот партнер не е доволно добар.

Истото важи и за партнерот - не се лутете кога и тој/таа ќе го направи истото. Сепак има разлика меѓу загледување и вртење или буквално потекување лиги по некој згоден минувач.

Тоа едноставно не е во ред. А ако сте доволно самоуверени (а зошто не би биле?) можете и сами да искоментирате дека момчето/девојката што ги загледува партнерот и според вас изгледаат добро.

Правило 2: Треба да се дава целосен извештај за минатиот ден

Прекршете го: Па не сте сраснати еден за друг, нели? Не треба да чувствувате обврска да му ги кажете сите детали за тоа како поминал вашиот ден. Она што едвај чекате да го кажете некому, секако. Важните работи, секако. Работите што се од заеднички интерес, секако. Она што знаете дека ќе му/ѝ се допадне или ќе го расположи, секако.

Правило 3: Сексот секогаш треба да биде спонтан

Прекршете го: Би требало да поработите за да имате редовен секс, особено во подолга врска каде стресот на секојдневието понекогаш ја засенува страста. Ако сте презафатени, одвојте термин во својот распоред и кажете му/ѝ дека сакате да водите љубов вечерва.

Правило 4: Не смеете да зборувате со бившите

Прекршете го: Нема причина сосема да прекинете контакт со некој кој ви е драг, и откако не успеала љубовната врска го сметате за пријател. Сепак, ова треба убаво да му се објасни на сегашниот партнер бидејќи не треба да се чувствува загрозен.

Од време на време може да го поканите сегашниот партнер да дојде кога пиете кафе со бившиот, па така да се увери дека веќе не постојат романтични чувства меѓу вас.

Правило 5: Нашите правила се непроменливи

Прекршете го: Првите четири се универзални правила што се подразбираат во скоро секоја врска. Но, постојат низа правила што секоја двојка си ги создава со намера да ги избегне расправиите.

Не мора да се чувствувате лошо ако некој договор повеќе не ви изгледа логичен бидејќи сте влегле во поинаква фаза на врската или едноставно сте увиделе дека правилото не функционира.

Без разлика дали станува збор за договор дека секогаш ќе се слушнете пред спиење, дека еднаш неделно ќе ручате сами или дека ќе си ги запишувате нештата што ви пречат и еднаш месечно ќе ги разменувате ливчињата...

Што и да е, ако не ви се допаѓа повеќе, не треба да го правите со сила. Да одлучите да ги прекршите сопствените правила не значи дека врската се распаѓа.