Девојки одговараат: Колку ми е важен статусот „во врска“ на социјалните мрежи?

Мислењата се поделени, но факт е дека споделувањето на љубовната состојба со виртуелните пријатели е тема за дискусија на многубројни парови.

Сакале тоа да го признаеме или не, социјалните мрежи поставија сосема нови стандарди во светот на љубовните односи. Еден од почестите проблеми на новите парови е и „верификувањето“ на врската на Фејсбук.

Запрашани да откријат колку ним им е важен статусот „во врска“ на социјалните мрежи, неколку припаднички на понежниот пол ги дадоа следните одговори:

„Мене ми е многу важно, затоа што сѐ денеска се случува на социјалните мрежи. Доколку на нив никаде не е назначено дека сте во врска, тоа испраќа порака дека можеби и не сте. Кај ваквите работи сакам сѐ да е транспарентно, како заради себе, така и за другите.“

„Важно ми е да се знае дека сум во врска (за да не ми здодеваат други и дечко ми да знае дека не се претставувам како сингл), ама никогаш немам објавено со кого сум во врска. Во секој случај, сметам дека е важно да објавите дека не сте слободни, од почитување кон другата особа.“

„Со дечкото сме заедно веќе 6 години, но никогаш не сме го објавиле статусот „во врска“. Тоа си е наша работа и сакаме така и да остане. Секако, имаше и луѓе кои нѐ прашуваа зошто тоа не го споделиме и на Фејсбук...како да е Фејсбук некое мерило за сериозност на врската.“

„Важно ми е, бидејќи имав дечко кој секогаш викаше дека тоа му е небитно, а подоцна дознав дека статусот „сингл“ баш многу му помогнал во освојувањето други жени. Ако сме заедно, тогаш не смее да биде проблем тоа и да го објавиме на Фејсбук.“

„Мислам дека луѓето премногу се оптоваруваат, некои и до таа мера што си ја уништуваат добрата врска, бидејќи се преоптоварени со називите и статусите. Важно е нам да ни е убаво, затоа што ако не ни е, не постои статус на Фејсбук кој ќе ги поправи нештата.“

Кое е вашето мислење на оваа тема? Споделете го со нас во коментари!

 М. А. | Црнобело