Што треба да направите со партнерот после кавга, за среќна врска?

Расправиите и конфликтите во врската не се ништо ново, а колку и да не ги сакате, понекогаш се дури и добри за вас. Но, неретко, поради гнев и нервоза, за време на расправијата можете да кажете зборови што воопшто не ги мислите и да го нарушите односот со партнерот.

Важно е после расправата да не се преправате со партнерот како ништо да не се случило, туку да извлечете некоја поука од целата ситуација.

Па, погледнете што треба да направите со партнерот после кавга, за врската да не трпи последици:

Дајте си простор

Ако забележите дека сте навистина гневни, најдобро е да си дадете простор еден на друг. На овој начин ќе го избегнете дополнителното расправање и ќе имате време да размислите за целата ситуација.

Вратете се на проблемот и решете го на мирен начин

Секоја расправија е поради некој проблем. Сега кога сте смирени и кога гневот поминал, обидете се да разговарате мирно. Токму смирениот разговор ќе го подобри односот и сигурно ќе ви помогне да најдете заедничко решение.

Проверете дали постои некој поголем проблем

Понекогаш во врските се создаваат и поголеми проблеми за кои не сте ни свесни. Токму тој голем проблем може да предизвикува разни мали расправи што не се ни поврзани со него.

Добро размислете дали има нешто што ви пречи вам или на партнерот. Споделете ја вашата загриженост и обидете се да ја најдете вистинската причина за кавгата.

Продолжете понатаму без замерки

Откако ќе го најдете решението, оставете ја расправата зад вас. Без разлика што сте кажале, простете си и не се навраќајте на тоа. Немојте никогаш да ја користите расправата како аргумент за некој конфликт во иднина.

За ова можеби ќе ви биде потребна сила и храброст, но ако помеѓу вас навистина постои разбирање, тоа не би требало да биде проблем. Сепак, во врската сте заедно и треба да се однесувате како тим, без разлика на околностите.

Разговарајте со професионалец

Доколку забележите дека расправите се чести и никако не можете да најдете решение, можеби треба да се консултирате со професионалец.

Ова не значи дека вашата врска е осудена на пропаст, туку едноставно не можете да сфатите кои се разликите што предизвикуваат конфликт. Професионалецот ќе ви помогне да го откриете тоа и еднаш засекогаш да најдете решение.

Спирова С. | Црнобело