Кожа со акни - дали да користите пудра за лице?

Акните не се проблем кој ги засега само тинејџерите. Скоро 80% од луѓето се имаат соочено со акните во одреден момент од нивниот живот.

Иако многумина ја имале среќата лесно да се справат и да си ја повратат убавината на кожата, милиони луѓе низ светот сè уште се обидуваат да го најдат соодветниот продукт кој ќе им помогне да ја надминат оваа состојба. Додека го бараат виситинскиот продукт за смирување и потполно излекување на акните врз кожата нанесуваат пудра се со цел да се затскрие оваа состојба.

Дали врз кожа која е зафатена со акни треба да се нанесува пудра? Одговорот не мора да биде секогаш: „Не. Не.“ Пудрата може да биде и бенефит за Вашата кожа само треба само да се направи вистинскиот избор.

Нанесувањето соодветна пудра ја штити кожата од аеро-загадување, ги покрива неправилностите (акни, мозолчиња), и го поттикнува Вашиот убав изглед, воедно предизвикувајќи чувство на удобност и зголемена самодоверба.

Постои само еден услов, секогаш да се исчисти лицето од нанесената пудра пред  спиење. На тој начин ја отстрануваме нечистотијата генерирана во текот на денот и му овозможуваме на лицето да „дише”, стремејќи се кон вашите цели за здрава и чиста кожа.

Изборот на пудра треба да соодвествува на состојбата на Вашата кожа. Доколку кожата на лицето е зафатена со акни треба да се одлучиме за производ без додаток на минерални масла (петролеум и негови деривати), кои може дополнително да ја иритираат кожата.

Пудрата која ја нанесуваме претставува секојдневна бариера помеѓу Вашата кожа и надворешната средина, поради што треба да биде внимателно избрана.

Текстурата на пудрата треба да биде прилагодена  на состојбата на кожата, не предизвикувајќи дополнителна агресија, истовремено овозможувајќи и на Вашата кожа да дише. Комбинираната и масна кожа бараат oil-free пудра која ќе го регулира масниот сјај и нема да ги запушува порите.

Тоа може да биде и минерална пудра која поради природните состојќи е соодветна за кожа со акни, како и за состојби на розацеа и егзема. Чувствителната кожа е особено реактивна, поради што пудрата треба да биде со хипоалергена формула, хидрантна и да го воедначува тенот.   

д-р Искра Петрова Шешова
Спец. дерматолог

Ординација д-р Анчевски
www.ancevski.com.mk