Би носеле ли пластични проѕирни фармерки?! (фото)

Да, добро прочитавте. 100% пластика. И потполно проѕирни. По пластичните чизми, тие се новата модна екстраваганција на пазарот.

„Размислувајте надвор од кутијата со овие неoбични, проѕирни и пластични фармерки – луѓето гарантирано ќе зборуваат за нив.“

Вака звучи слоганот на страницата на познатиот британски бренд Topshop, кој прв ги пушти во продажба пластичните проѕирни фармерки МОТО, претендирајќи да им украде дел од „славата“ на веќе популарните обувки од ист материјал.

И навистина, корисниците на социјалните мрежи веќе зборуваат за нив, но не од рекламираните причини:

„Па, како да не зборуваат, кога се проѕирни и сè се гледа? “ - „Проѕирни фармерки?! Која е поентата?“ - „А, што да облечеме под нив?!“ - „Ќе се препотам!“ - „Конечно фармерки што нема да избледат при перење“ .

Во описот под производот, за фармерките се вели дека се идеално парче за оставање впечаток на фестивали или костимирани забави.

Понатаму, од Topshop истакнуваат дека може да се носат со бикини и светкава јакничка, или како слоевито парче, во комбинација со асиметричен фустан или предимензиониран пуловер.

Изработени се по пример на фармерките со класичен рамен крој, а имаат и стандарни џебови, како и скусени ногавици.

Нивната цена изнесува 76 евра, а веќе масовно се купуваат од официјалната онлајн продавница на Topshop. Можно ли е да станат тренд?!

Не сме целосно сигурни која е намената на овие „фармерки“, но затоа сме убедени дека некои славни дами ќе посакаат да ги облечат на себе.

Што велите вие – би носеле ли проѕирни фармерки?

• 
• 
• 
• 
• 
•  

М. А. | Црнобело