Како да престанете постојано да им забранувате сè на вашите деца (и зошто е тоа добро)?

Дозволете им на децата да прават работи кои вообичаено им се забранети како, на пример, да изедат уште едно парче торта, самите да си направат јадење, самите да си изберат облека, да шетаат по дождот… Генерално, дозволете им да бидат деца.

Дали и вие како родител чувствувате дека постојано му велите „не“ на вашето дете?

Нормално е да сакате да поставите одредени граници, но сепак, важно е да останете поврзани и да ја одржувате потребната и посакуваната близина. Зар не би било добро да можете да го научите детето што смее, а што не смее, без постојано да му велите „не“?

Добрата вест е дека ова е возможно, само треба да научите да погледнете од позитивната перспектива.

Согледувајќи ги работите од друг агол, ќе добиете многу бенефиции: ќе ја зајакнете врската родител-дете, ќе му ја подобрите емоционалната интелигенција, ќе изградите здрав однос, ќе му помогнете на вашето дете полесно да го прифати она „не“, ќе добиете помалку тантруми…

Неколку совети што ќе ви помогнат во ова:

Бидете спонтани

Повеќето родители се водат според рутина, па отстапувањето од плановите им доаѓа неприродно. Но, доколку бидете спонтани одвреме-навреме, нема да биде воопшто лошо.

Дозволете им на децата да прават работи кои вообичаено им се забранети како, на пример, да изедат уште едно парче торта, самите да си направат јадење, самите да си изберат облека, да шетаат по дождот…

Не кажувајте ништо во ситуации кога вообичаено би рекле нешто

Понекогаш децата не бараат дозвола од нас за нешто, туку едноставно го прават тоа. Наместо секогаш да велите „не“ и да ги прекорувате, премолчете, секако, кога ситуацијата ви го дозволува тоа.

На пример, во одреден момент дозволете му на вашето дете да преземе ризик. Кога би сакале да кажете „Биди внимателен“, премолчете и набљудувајте го. Кога шетате во паркот, понекогаш дозволете му да згази во калта.

Детето ќе биде среќно, а ќе ги извалка само чевлите кои секако ќе ги надрасне по некој месец.

Не ја започнувајте секоја ваша реченица со „не“

Многу родители речиси секоја реченица ја започнуваат со „не“ или „немој“. Бидете креативни, добијте го посакуваното, но без да ги користите овие зборови.

Секако, кога повеќепати ќе кажете „не“, тогаш може да настапат тантруми и да ви треба подолго време да го смирите детето. На пример, наместо да кажете „Не трчај“, кажете „Оди полека“.

Дозволете им на децата да бидат деца

Децата треба да бидат деца, понекогаш да бидат валкани и неуредни, затоа што поголемиот дел од времето го поминуваат во игра.

Многупати тоа е неприфатливо за родителите, затоа што потоа треба да го средуваат целиот неред, да ги бањаат децата…

Но, треба да се погледне од поинаков агол на работите и да им се дозволи да уживаат во безгрижните денови.

Покрај ова, не заборавајте понекогаш и на себе да си кажете „да“ – ќе се чувствувате подобро, а со тоа и целото семејство ќе биде поздраво и посреќно!

М. Ѓ | Црнобело / фото: freepik.com